Home » Kannada News » ಭಾರತದ ಯುವ ಪಡೆ ಐಪಿಎಲ್‌ನಂತೆ ಲಂಕಾ ಎದುರು ಅಬ್ಬರಿಸಲಿದೆ: ಭುವಿ!

ಭಾರತದ ಯುವ ಪಡೆ ಐಪಿಎಲ್‌ನಂತೆ ಲಂಕಾ ಎದುರು ಅಬ್ಬರಿಸಲಿದೆ: ಭುವಿ!

ಹೈಲೈಟ್ಸ್‌:

  • ಭಾರತ-ಶ್ರೀಲಂಕಾ ನಡುವಣ ಟಿ20 ಕ್ರಿಕೆಟ್ ಮತ್ತು ಏಕದಿನ ಕ್ರಿಕೆಟ್‌ ಸರಣಿ.
  • ಟೀಮ್ ಇಂಡಿಯಾದ ಉಪನಾಯಕನ ಜವಾಬ್ದಾರಿ ಪಡೆದಿರುವ ಭುವನೇಶ್ವರ್ ಕುಮಾರ್‌.
  • ಯುವ ಪೀಳಿಗೆಯವರಲ್ಲಿ ಐಪಿಎಲ್‌ ಆಡಿದ ವಿಶ್ವಾಸವಿದೆ ಎಂದ ಭಾರತದ ಉಪನಾಯಕ.

ಹೊಸದಿಲ್ಲಿ: ವಿರಾಟ್‌ ಕೊಹ್ಲಿ ಸಾರಥ್ಯದ ಟೀಮ್ ಇಂಡಿಯಾ ಇಂಗ್ಲೆಂಡ್ ಪ್ರವಾಸದಲ್ಲಿರುವ ಸಂದರ್ಭದಲ್ಲಿ ಭಾರತದ ಎರಡನೇ ತಂಡವನ್ನು ಬಿಸಿಸಿಐ ಸೀಮಿತ ಓವರ್‌ಗಳ ಸರಣಿಗಳ ಸಲುವಾಗಿ ಶ್ರೀಲಂಕಾಕ್ಕೆ ಕಳುಹಿಸಿಕೊಟ್ಟಿದೆ. ಈ ತಂಡದಲ್ಲಿ ಭಾರತದ ಪರ ಇನ್ನು ಒಮ್ಮೆಯೂ ಆಡದ 6 ಯುವ ಆಟಗಾರರಿದ್ದಾರೆ ಎಂಬುದು ವಿಶೇಷ.

ಭಾರತ ತಂಡದ ಈ ಪ್ರವಾಸಕ್ಕೆ ಉಪನಾಯಕನ ಜವಾಬ್ದಾರಿ ಹೊತ್ತಿರುವ ಅನುಭವಿ ವೇಗದ ಬೌಲರ್‌ ಭುವನೇಶ್ವರ್‌ ಕುಮಾರ್‌, ಈ ಕುರಿತಾಗಿ ಮಾತನಾಡಿದ್ದು ಟೀಮ್ ಇಂಡಿಯಾದ ಯುವ ಆಟಗಾರರಲ್ಲಿ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಆಡಿದ ವಿಶ್ವಾಸವಿದ್ದು, ಲಂಕಾ ಎದುರು ಅಬ್ಬರಿಸಲಿದ್ದಾರೆ ಎಂದು ಆತ್ಮವಿಶ್ವಾಸ ಹೊರಹಾಕಿದ್ದಾರೆ.

ಮಾರ್ಚ್‌ 4ರಂದು ಕೊರೊನಾ ವೈರಸ್‌ ಕಾರಣ ಅಂತ್ಯಗೊಂಡ ಐಪಿಎಲ್ 2021 ಟೂರ್ನಿಯಲ್ಲಿ ಹಲವು ಯುವ ಆಟಗಾರರು ಮಿಂಚಿ ಟೀಮ್ ಇಂಡಿಯಾ ಸೆಲೆಕ್ಟರ್ಸ್‌ ಗಮನ ಸೆಳೆದಿದ್ದರು. ದೇವದತ್‌ ಪಡಿಕ್ಕಲ್, ಋತುರಾಜ್‌ ಗಾಯಕ್ವಾಡ್‌, ಚೇತನ್‌ ಸಾಕರಿಯ, ನಿತೀಶ್‌ ರಾಣಾ, ಕೆ ಗೌತಮ್‌ ಹಾಗೂ ವರುಣ್ ಚಕ್ರವರ್ತಿ ಅವರಂತಹ ಆಟಗಾರರು ಐಪಿಎಲ್‌ ಪ್ರದರ್ಶನದ ಆಧಾರದ ಮೇರೆಗೆ ಟೀಮ್ ಇಂಡಿಯಾ ಟಿಕೆಟ್‌ ಸಂಪಾದಿಸಿದ್ದಾರೆ.

ಐಸಿಸಿ ಟ್ರೋಫಿ ಅಲ್ಲ ಕೊಹ್ಲಿಗೆ ಐಪಿಎಲ್‌ ಕೂಡ ಗೆಲ್ಲೋದಕ್ಕಾಗಿಲ್ಲ: ರೈನಾ!

“ನಮ್ಮ ತಂಡದಲ್ಲಿ ಅತ್ಯುತ್ತಮ ಆಟಗಾರರು ಇದ್ದಾರೆ. ಇವೆರೆಲ್ಲರಿಗೂ ಐಪಿಎಲ್‌ನಲ್ಲಿ ಆಡಿದ ಅನುಭವವಿದೆ. ಇವರು ಯುವ ಆಟಗಾರರು ಸರಿ. ಆದರೆ ಐಪಿಎಲ್‌ನಲ್ಲಿ ಮಿಂಚಿದ ಅನುಭವವಿದೆ. ಹಲವು ವರ್ಷಗಳಿಂದ ಟಿ20 ಕ್ರಿಕೆಟ್‌ ಆಡುತ್ತಿದ್ದಾರೆ. ಸ್ಥಿರ ಪ್ರದರ್ಶನವನ್ನೂ ಕಾಯ್ದುಕೊಂಡಿದ್ದಾರೆ. ಹೀಗಾಗಿ ಶ್ರೀಲಂಕಾ ಎದುರು ಮಿಂಚುತ್ತಾರೆಂಬ ವಿಶ್ವಾಸ ನನಗಿದೆ,” ಎಂದು ‘ಫಾಲೋ ದಿ ಬ್ಲೂಸ್‌’ ಕಾರ್ಯಕ್ರಮದಲ್ಲಿ ಭುವಿ ಮಾತನಾಡಿದ್ದಾರೆ.

“ಆಟಗಾರರು ಐಪಿಎಲ್‌ನಲ್ಲಿ ಸಿಕ್ಕಿರುವ ಆತ್ಮವಿಶ್ವಾಸವನ್ನು ಮುಂದುವರಿಸುವುದು ತಂಡಕ್ಕೆ ಅನುಕೂಲಕರವಾಗಲಿದೆ. ಯುವ ಮತ್ತು ಪ್ರತಿಭಾನ್ವಿತರು ತಂಡದಲ್ಲಿ ಇದ್ದಾರೆ. ಜೊತೆಗೆ ಅವರಿಗೆ ಮಾರ್ಗದರ್ಶನ ನೀಡಬಲ್ಲ ಅನುಭವಿಗಳೂ ಇದ್ದಾರೆ. ಹೀಗಾಗಿ ಶ್ರೀಲಂಕಾ ವಿರುದ್ಧದ ಸರಣಿಗೆ ಭಾರತ ತಂಡ ಸಮತೋಲನದಿಂದ ಕೂಡಿದೆ,” ಎಂದು ಭುವನೇಶ್ವರ್‌ ಕುಮಾರ್‌ ನುಡಿದಿದ್ದಾರೆ.

ಐಪಿಎಲ್‌ 2020 ಟೂರ್ನಿಯಲ್ಲಿ ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡದ ಪರ ಆಡುವಾಗ ತೊಡೆ ಸಂಧಿನ ಗಾಯದ ಸಮಸ್ಯೆಗೆ ತುತ್ತಾಗಿದ್ದ ಭುವನೇಶ್ವರ್‌ ಕುಮಾರ್‌ ದೀರ್ಘಕಾಲ ವಿಶ್ರಾಂತಿ ಪಡೆಯುವಂತ್ತಾಗಿತ್ತು. ಹೀಗಾಗಿ ಆಸ್ಟ್ರೇಲಿಯಾ ಪ್ರವಾಸದಿಂದಲೂ ಅವರು ಹೊರಗುಳಿದಿದ್ದರು. ಬಳಿಕ 2021ರ ಮಾರ್ಚ್‌ನಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಸೀಮಿತ ಓವರ್‌ಗಳ ಸರಣಿಯಲ್ಲಿ ಭಾರತ ತಂಡಕ್ಕೆ ಕಮ್‌ಬ್ಯಾಕ್‌ ಮಾಡಿದರು.

2021ರ ಸಾಲಿನ ತಮಿಳುನಾಡು ಪ್ರೀಮಿಯರ್‌ ಲೀಗ್‌ ವೇಳಾಪಟ್ಟಿ ಪ್ರಕಟ!

“ನಾನು ಗಾಯದ ಸಮಸ್ಯೆಯಿಂದ ಚೇತರಿಸಿದ ಸಂದರ್ಭದಲ್ಲಿ ದೇಶಿ ಟೂರ್ನಿಗಳು ಉತ್ತಮವಾಗಿ ನಡೆಯುತ್ತಿದ್ದವು. ಹೀಗಾಗಿ ಸಂಪೂರ್ಣ ಫಿಟ್ನೆಸ್‌ ಪಡೆದು ಭಾರತ ತಂಡಕ್ಕೆ ಕಮ್‌ಬ್ಯಾಕ್‌ ಮಾಡುವ ಪ್ರಯತ್ನ ಮಾಡಿದೆ. ಅಂತಾರಾಷ್ಟ್ರೀಯ ಪಂದ್ಯಗಳಿಗೆ ಪೂರ್ವ ತಯಾರಿ ಆರಂಭಿಸಿದ್ದೆ. ಇಂಗ್ಲೆಂಡ್‌ ವಿರುದ್ಧದ ಸರಣಿಗೂ ಮುನ್ನ ದೇಶಿ ಟೂರ್ನಿಗಳಲ್ಲಿ ಆಡಿದ್ದು, ನನ್ನ ಶ್ರೇಷ್ಠ ಲಯಕ್ಕೆ ಮರಳಲು ನೆರವಾಯಿತು. ಹೀಗಾಗಿ ದೇಶಿ ಟೂರ್ನಿಗಳಲ್ಲಿ ಆಡುವುದನ್ನು ಯಾರೊಬ್ಬರು ಕೂಡ ಹಗುರವಾಗಿ ಪರಿಗಣಿಸಬಾರದು,” ಎಂದು ತಮ್ಮ ಕಮ್‌ಬ್ಯಾಕ್‌ ಹಾದಿಯನ್ನು ಬಲಗೈ ಸ್ವಿಂಗ್ ಬೌಲರ್‌ ಸ್ಮರಿಸಿದ್ದಾರೆ.

ಭಾರತ ಮತ್ತು ಶ್ರೀಲಂಕಾ ನಡುವಣ ತಲಾ 3 ಪಂದ್ಯಗಳ ಟಿ20 ಕ್ರಿಕೆಟ್‌ ಮತ್ತು ಏಕದಿನ ಕ್ರಿಕೆಟ್‌ ಸರಣಿಗಳು ಜುಲೈ 13ರಿಂದ 25ರವರೆಗೆ ನಡೆಯಬೇಕಿತ್ತು. ಆದರೆ, ಶ್ರೀಲಂಕಾ ತಂಡದ ಬ್ಯಾಟಿಂಗ್ ಕೋಚ್‌ ಮತ್ತು ಸಹಾಯಕ ಸಿಬ್ಬಂದಿಯಲ್ಲಿ ಕೊರೊನಾ ವೈರಸ್‌ ಸೋಂಕು ಪತ್ತೆಯಾದ ಕಾರಣ ಈ ವೇಳಾಪಟ್ಟಿಯಲ್ಲಿ ಹೊಂದಾಣಿಕೆ ಮಾಡಲಾಗಿದೆ. ನೂತನ ವೇಳಾಪಟ್ಟಿ ಅನುಗುಣವಾಗಿ ಜುಲೈ 18ರಿಂದ 27ರವರೆಗೆ ಸರಣಿಗಳು ನಡೆಯಲಿದೆ.

ಬೃಹತ್ ಹರಾಜಿಗೂ ಮುನ್ನ ಮುಂಬೈ ಉಳಿಸಿಕೊಳ್ಳಬೇಕಾದ 4 ತಾರೆಗಳನ್ನು ಹೆಸರಿಸಿದ ಚೋಪ್ರಾ!

ಶ್ರೀಲಂಕಾ ಪ್ರವಾಸಕ್ಕೆ ಭಾರತ ತಂಡ
ಶಿಖರ್ ಧವನ್ (ನಾಯಕ), ಪೃಥ್ವಿ ಶಾ, ದೇವದತ್ ಪಡಿಕ್ಕಲ್, ಋತುರಾಜ್ ಗಾಯಕ್ವಾಡ್, ಸೂರ್ಯಕುಮಾರ್ ಯಾದವ್, ಮನೀಶ್ ಪಾಂಡೆ, ಹಾರ್ದಿಕ್ ಪಾಂಡ್ಯ, ನಿತೀಶ್ ರಾಣಾ, ಇಶಾನ್ ಕಿಶನ್ (ವಿಕೆಟ್‌ಕೀಪರ್), ಸಂಜು ಸ್ಯಾಮ್ಸನ್ (ವಿಕೆಟ್‌ಕೀಪರ್), ಯುಜ್ವೇಂದ್ರ ಚಹಲ್, ರಾಹುಲ್ ಚಹರ್, ಕೆ ಗೌತಮ್, ಕ್ರುಣಾಲ್ ಪಾಂಡ್ಯ, ಕುಲ್ದೀಪ್ ಯಾದವ್, ವರುಣ್ ಚಕ್ರವರ್ತಿ, ಭುವನೇಶ್ವರ್ ಕುಮಾರ್ (ಉಪನಾಯಕ), ದೀಪಕ್ ಚಹರ್, ನವದೀಪ್ ಸೈನಿ, ಚೇತನ್ ಸಕರಿಯಾ. ನೆಟ್‌ ಬೌಲರ್ಸ್‌: ಇಶಾನ್‌ ಪೊರೆಲ್, ಸಂದೀಪ್ ವಾರಿಯರ್‌, ಅರ್ಷದೀಪ್‌ ಸಿಂಗ್, ಸಾಯ್‌ ಕಿಶೋರ್, ಸಿಮ್ರನ್‌ಜೀತ್‌ ಸಿಂಗ್.

ಭಾರತದ ಶ್ರೀಲಂಕಾ ಪ್ರವಾಸದ ಹೊಸಾ ವೇಳಾಪಟ್ಟಿ
ಜುಲೈ 17, ಮೊದಲ ಒಡಿಐ
ಜುಲೈ 19, ಎರಡನೇ ಒಡಿಐ
ಜುಲೈ 21, ಮೂರನೇ ಒಡಿಐ
ಜುಲೈ 24, ಮೊದಲ ಟಿ20-ಐ
ಜುಲೈ 25, ಎರಡನೇ ಟಿ20-ಐ
ಜುಲೈ 27, ಮೂರನೇ ಟಿ20-ಐ
(ಎಲ್ಲಾ ಪಂದ್ಯಗಳು ಕೊಲೊಂಬೋದ ಆರ್‌ ಪ್ರೇಮದಾಸ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಬಯೋ ಸೆಕ್ಯೂರ್‌ ವಾತಾವರಣದ ಅಡಿ ನಡೆಯಲಿದೆ)


Source link

x

Check Also

ಎಂಟನೇ ಅದ್ಭುತ: ಮಂಜು ಜೊತೆಗಿನ ಮುನಿಸು ಮರೆತು ‘ಓ ಗೆಳೆಯ..’ ಎಂದ ಪ್ರಶಾಂತ್ ಸಂಬರಗಿ!

ಹೈಲೈಟ್ಸ್‌: ‘ಬಿಗ್ ಬಾಸ್’ ಮನೆಯಲ್ಲಿ ನಡೆದಿದೆ ಅಚ್ಚರಿಯ ಘಟನೆ! ಪ್ರಶಾಂತ್ ಸಂಬರಗಿ ಹಾಗೂ ಮಂಜು ಪಾವಗಡ ಮಧ್ಯೆ ಮತ್ತೆ ಚಿಗುರಿದೆ ...