Home » Kannada News » ವಿಶಿಷ್ಟ ಹಲಸಿನ ಹಣ್ಣಿನ ಚಾಕಲೇಟ್‌ ಬಿಡುಗಡೆ ಮಾಡಿದ ಕ್ಯಾಂಪ್ಕೋ

ವಿಶಿಷ್ಟ ಹಲಸಿನ ಹಣ್ಣಿನ ಚಾಕಲೇಟ್‌ ಬಿಡುಗಡೆ ಮಾಡಿದ ಕ್ಯಾಂಪ್ಕೋ

ಹೈಲೈಟ್ಸ್‌:

  • ಹಲಸಿನ ಹಣ್ಣಿನ ಚಾಕಲೇಟ್‌ ಬಿಡುಗಡೆ ಮಾಡಿದ ಕ್ಯಾಂಪ್ಕೋ
  • ಸಹಕಾರಿ ಸಂಸ್ಥೆ ಕ್ಯಾಂಪ್ಕೊದಿಂದ ಸ್ವಾದಿಷ್ಟ ಜಾಕಲೇಟ್‌ ಉತ್ಪಾದನೆ
  • ಹಲವು ವಿಧದ ಚಾಕಲೇಟ್‌ ಪರಿಚಯಿಸಿರುವ ಸಂಸ್ಥೆ

ಶಿರಸಿ: ಸಹಕಾರಿ ಸಂಸ್ಥೆ ಕ್ಯಾಂಪ್ಕೋ ಉತ್ಪಾದನೆ ಮಾಡಿರುವ ಹಲಸಿನ ಹಣ್ಣಿನ ಚಾಕಲೇಟ್‌ನ್ನು ಬುಧವಾರ ನಗರದ ಸಂಸ್ಥೆಯ ಆವರಣದಲ್ಲಿ ಬಿಡುಗಡೆ ಮಾಡಲಾಯಿತು.

ಕ್ಯಾಂಪ್ಕೊ ನಿರ್ದೇಶಕ ಶಂಭುಲಿಂಗ ಹೆಗಡೆ ಗ್ರಾಹಕರಿಗೆ ಚಾಕಲೇಟ್‌ ವಿತರಿಸುವ ಮೂಲಕ ಬಿಡುಗಡೆಗೊಳಿಸಿದರು. ಹಲವು ಸಹಕಾರಿಗಳ ಪ್ರಯತ್ನದಿಂದ ಬೆಳೆದ ಕ್ಯಾಂಪ್ಕೋ ಸಂಸ್ಥೆ ದೇಶದಲ್ಲೆ ಮಾದರಿಯಾಗಿ ನಿಂತಿದೆ. ಕಳೆದ ಸಾಲಿನಲ್ಲಿ 118 ಕೋಟಿ ಲಾಭ ಗಳಿಸಿದೆ ಎಂದರು.

ಸಂಸ್ಥೆ ರೈತರ ಆಶೋತ್ತರ ಈಡೇರಿಸುತ್ತಿದೆ. ಅಡಕೆ ಬೆಳೆ ಪ್ರದೇಶ ವರ್ಷದಿಂದ ವರ್ಷಕ್ಕೆ ಜಾಸ್ತಿ ಆಗುತ್ತಿದೆ. ಆದರೂ ಬೆಲೆ ಸ್ಥಿರತೆ ಕಾಪಾಡುವಲ್ಲಿ ಸಂಸ್ಥೆ ಪ್ರಯತ್ನಿಸುತ್ತಿದೆ ಎಂದು ತಿಳಿಸಿದರು.

ಅಡಿಕೆಯನ್ನು ‘ಒಣಹಣ್ಣು ಮತ್ತು ಬೀಜ’ ಎಂದು ಗುರುತಿಸಲು ಕ್ಯಾಂಪ್ಕೊ ಆಗ್ರಹ
ರೈತರು ಒಂದೇ ಬೆಳೆ ನಂಬಿಕೊಂಡು ಇರಬಾರದು ಎಂದು ಬೆಳೆದ ಕೊಕ್ಕೊ ಬೆಳೆಗೆ ಮಾರುಕಟ್ಟೆ ವ್ಯವಸ್ಥೆ ಕಲ್ಪಿಸಲು, ರೈತರಿಗೆ ಹೆಚ್ಚಿನ ಬೆಲೆ ದೊರಕಿಸಲು ಸಂಸ್ಥೆ ಕೊಕ್ಕೊ ಚಾಕಲೇಟ್‌ ಪ್ಯಾಕ್ಟರಿ ಆರಂಭಿಸಿ ಮಾರುಕಟ್ಟೆ ಮಾಡುತ್ತಿದೆ. ಕಳೆದ ಮೂರ್ನಾಲ್ಕು ವರ್ಷಗಳಿಂದ ಕಾಳುಮೆಣಸು ಖರೀದಿ ಮಾಡುತ್ತಿದ್ದೇವೆ. ಕಳೆದ ವರ್ಷ 10 ಸಾವಿರ ಕ್ವಿಂಟಲ್‌ ಖರೀದಿಸಿದ್ದೇವೆ. ಈಗ ಗೊದಾಮು ಸಮಸ್ಯೆ ನಿವಾರಣೆಯಾಗಿದ್ದು ಈ ಬಾರಿ 15-18ಸಾವಿರ ಕ್ವಿಂಟಲ್‌ ಖರೀದಿ ಗುರಿ ಹೊಂದಿದ್ದೇವೆ. ಸಂಸ್ಥೆ ರೈತರಿಗೆ ಪೂರಕವಾಗಿ ನಿಂತಿದೆ ಎಂದರು.

ರೈತರು ಸಹಕಾರಿ ವ್ಯವಸ್ಥೆಯಲ್ಲೆ ತಾವು ಬೆಳೆದ ಉತ್ಪನ್ನ ಮಾರಾಟ ವ್ಯವಹಾರ ನಡೆಸಬೇಕು. ಇದರಿಂದ ಬೆಳೆಯ ಬೆಲೆ ಸ್ಥಿರತೆ ಸಾಧಿಸಲು ಸಾಧ್ಯವಾಗುತ್ತದೆ.

ಶಂಭುಲಿಂಗ ಹೆಗಡೆ, ಕ್ಯಾಂಪ್ಕೋ ನಿರ್ದೇಶಕ

ಹಲವು ವಿಧದ ಚಾಕಲೇಟ್‌ ಪರಿಚಯಿಸಿರುವ ಸಂಸ್ಥೆ, ಗುಣಮಟ್ಟದ ಕಲಬೆರಕೆ ಇಲ್ಲದ ಚಾಕಲೇಟ್‌ ಉತ್ಪಾದಿಸುತ್ತಿದೆ. ಬೆಲ್ಲದ ಚಾಕಲೇಟ್‌, ಆಯುರ್ವೇದ ಗುಣಧರ್ಮ ಇರುವ ಚಾಕಲೇಟ್‌ ತಯಾರಿಸಲು ಅಧಿಕಾರಿಗಳಿಗೆ ಸಲಹೆ ನೀಡಿದ್ದೇವೆ. ಈ ಮೂಲಕ ರೈತ ಬೆಳೆದ ಉತ್ಪನ್ನಕ್ಕೂ ಮಾರುಕಟ್ಟೆ ಸಿಗಬೇಕು ಎಂಬುದು ನಮ್ಮ ಉದ್ದೇಶವಾಗಿದೆ ಎಂದು ಹೇಳಿದರು.

ಸಂಸ್ಥೆಯ ಹುಬ್ಬಳ್ಳಿ ವಿಭಾಗದ ಮಾರುಕಟ್ಟೆ ವ್ಯವಸ್ಥಾಪಕ ಶಿವಮಾದ ನಾಯಕ ಮಾತನಾಡಿ, 24 ವಿಧದ ಸ್ವಾದಿಷ್ಟ ಚಾಕಲೇಟ್‌ನ್ನು ಕ್ಯಾಂಪ್ಕೊ ಮಾರುಕಟ್ಟೆಗೆ ಈಗಾಗಲೇ ಬಿಡುಗಡೆ ಮಾಡಿದೆ. ಇನ್ನು ಹಲವು ವೆರೈಟಿಯ ಚಾಕಲೇಟ್‌ ತಯಾರಿಸುವ ಉದ್ದೇಶವಿದೆ. ಉತ್ತರ ಕನ್ನಡ ಜಿಲ್ಲೆಯಲ್ಲೂ ಉತ್ತಮ ಬೇಡಿಕೆಯಿದೆ ಎಂದರು.

ಪ್ರಾದೇಶಿಕ ವ್ಯವಸ್ಥಾಪಕ ಭರತ ಭಟ್ಟ, ಗಜಾನನ ಭಟ್ಟ ಉಪಸ್ಥಿತರಿದ್ದರು.


Source link

x

Check Also

ಎಂಟನೇ ಅದ್ಭುತ: ಮಂಜು ಜೊತೆಗಿನ ಮುನಿಸು ಮರೆತು ‘ಓ ಗೆಳೆಯ..’ ಎಂದ ಪ್ರಶಾಂತ್ ಸಂಬರಗಿ!

ಹೈಲೈಟ್ಸ್‌: ‘ಬಿಗ್ ಬಾಸ್’ ಮನೆಯಲ್ಲಿ ನಡೆದಿದೆ ಅಚ್ಚರಿಯ ಘಟನೆ! ಪ್ರಶಾಂತ್ ಸಂಬರಗಿ ಹಾಗೂ ಮಂಜು ಪಾವಗಡ ಮಧ್ಯೆ ಮತ್ತೆ ಚಿಗುರಿದೆ ...