Home » Telugu News » పెట్రోల్ ధరలు పెరిగాయా? అయితే అఫ్గన్ వెళ్లండి.. మీడియాపై బీజేపీ ఎంపీ చిందులు!

పెట్రోల్ ధరలు పెరిగాయా? అయితే అఫ్గన్ వెళ్లండి.. మీడియాపై బీజేపీ ఎంపీ చిందులు!


పెట్రోల్, డీజిల్ ధరల పెరుగుదలపై మీడియా ప్రతినిధులు ప్రశ్నించినందుకు చిందులు వేసిన ఎంపీ.. వివాదాస్పద వ్యాఖ్యలు చేశారు. పెరిగిపోయాయని భావిస్తే తాలిబన్ల వశమైన అఫ్గనిస్థాన్‌కు వెళ్లండి అంటూ జర్నలిస్ట్‌లపై మధ్యప్రదేశ్‌కు చెందిన బీజేపీ ఎంపీ విరుచుకుపడ్డారు. పెట్రోల్, డీజిల్ ధరల పెరుగుదలను ప్రశ్నించడంతో తీవ్ర అసహనం వ్యక్తం చేశారు. దేశంలో కోవిడ్ థర్డ్ వేవ్ మొదలైన ఈ సమయంలో ఇటువంటి ప్రశ్నలేంటని మండిపడ్డారు.

‘తాలిబన్ల దగ్గరకు వెళ్లండి.. అఫ్గనిస్థాన్‌లో లీటర్ పెట్రోల్ రూ.50లకే అమ్ముతున్నారు.. అక్కడకు వెళ్లి ట్యాంకులు నింపుకోండి.. అక్కడ నింపడానికి ఎవరూ లేరు.. కనీసం ఇక్కడ (భారత్‌) మనం భద్రంగా ఉన్నాం.. కరోనా థర్డ్ వేవ్ మొదలయ్యింది.. ఇప్పటికే భారత్‌‌లో కోవిడ్ రెండు దశల విజృంభణను ఎదుర్కొంది’ అంటూ మీడియా ప్రతినిధులపై ఆగ్రహం వ్యక్తం చేశారు. దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.

బీజేపీ ఎంపీ చుట్టూ భారీగా జనం గుమిగూడి ఏ ఒక్కరూ కనీసం కోవిడ్ నిబంధనలు పాటించలేదు. మాస్క్ కూడా వేసుకోని ఆయన జనం కోవిడ్ నిబంధనలు పాటించడం లేదంటూ జర్నలిస్ట్‌లకు లెక్చర్ ఇవ్వడం గమనార్హం. ‘మీరు ప్రముఖ జర్నలిస్ట్.. దేశంలో పరిస్థితిని ప్రధాని నరేంద్ర మోదీ ఎలా నియంత్రిస్తున్నారో మీకు తెలియదా.. దీనిని మీరు కూడా గ్రహించరా?.. దేశంలోని 80 కోట్ల మంది ప్రజలకు ఉచిత రేషన్ ఇస్తున్నారు’ అని అన్నారు. బుధవారం బీజేపీ యువ మోర్చా ఆధ్వర్యంలో మొక్కలు నాటే కార్యక్రమంలో ఎంపీ రతన్ పాయల్ ఈ వ్యాఖ్యలు చేశారు.

అఫ్గన్‌ను తాలిబన్లు స్వాధీనం చేసుకున్న తర్వాత అక్కడ పరిస్థితులపై బీజేపీ నేతలు వివాదాస్పద వ్యాఖ్యలు చేయడం ఇదే తొలిసారి కాదు. భారత్‌లో ఎవరైనా భయపడుతుంటే అఫ్గనిస్థాన్‌కు వెళ్లాలంటూ బీహార్‌కు చెందిన బీజేపీ నేత హరిభూషణ్ ఠాకూర్ నోరుజారి విమర్శలను ఎదుర్కొన్నారు. అక్కడ పెట్రోల్, డీజిల్ చాలా చవగ్గా వస్తాయి.. అఫ్గన్‌కు వెళ్లిన తర్వాత భారత్ విలువ ఏంటో తెలుసుకుంటారని ఆయన చేసిన వ్యాఖ్యలపై దుమారం రేగింది. ఇక, దేశంలో పెట్రోల్, డీజిల్ ధరలు రోజు రోజుకూ ఆకాశాన్నంటుతున్నాయి. రోజువారీ సమీక్ష విధానం అమల్లోకి వచ్చిన తర్వాత చమురు ధరలు తగ్గిన పాపాన పోలేదు.


Source link

x

Check Also

Varalakshmi Vratham Katha: వరలక్ష్మీ వ్రతం విశిష్ఠత.. పరమేశ్వరుడు, పార్వతికి చెప్పిన గాథ..!

పూర్వం శౌనకాది మహర్షులను ఉద్దేశించి సూత మహార్షి ఇలా చెప్పారు. మునులారా! స్త్రీలకు సౌభాగ్యాన్ని ప్రసాదించే ఒక వ్రతాన్ని పరమ ...