Home » Kannada News » ಅಗ್ರ ಸ್ಥಾನಕ್ಕೇರಿದ ಭಾರತ! ಟೆಸ್ಟ್‌ ಚಾಂಪಿಯನ್‌ಷಿಪ್‌ ಪಾಯಿಂಟ್ಸ್‌ ಟೇಬಲ್‌ ಇಂತಿದೆ..

ಅಗ್ರ ಸ್ಥಾನಕ್ಕೇರಿದ ಭಾರತ! ಟೆಸ್ಟ್‌ ಚಾಂಪಿಯನ್‌ಷಿಪ್‌ ಪಾಯಿಂಟ್ಸ್‌ ಟೇಬಲ್‌ ಇಂತಿದೆ..

ಹೈಲೈಟ್ಸ್‌:

  • ಭಾರತ ಹಾಗೂ ಇಂಗ್ಲೆಂಡ್‌ ನಡುವೆ ನಡೆಯುತ್ತಿರುವ 5 ಪಂದ್ಯಗಳ ಟೆಸ್ಟ್‌ ಸರಣಿ.
  • ಇಂಗ್ಲೆಂಡ್‌ ವಿರುದ್ಧ ಲಾರ್ಡ್ಸ್ ಟೆಸ್ಟ್‌ನಲ್ಲಿ 151 ರನ್‌ಗಳಿಂದ ಗೆದ್ದ ಭಾರತ ತಂಡ.
  • ಟೆಸ್ಟ್ ಚಾಂಪಿಯನ್‌ಷಿಪ್‌ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಅಗ್ರ ಸ್ಥಾನಕ್ಕೇರಿದ ಕೊಹ್ಲಿ ಪಡೆ.

ಲಂಡನ್‌: ಇಂಗ್ಲೆಂಡ್‌ ವಿರುದ್ಧ ಎರಡನೇ ಟೆಸ್ಟ್ ಪಂದ್ಯದಲ್ಲಿ 151 ರನ್‌ಗಳ ಭರ್ಜರಿ ಜಯ ಗಳಿಸಿದ ಭಾರತ ತಂಡ ಎರಡನೇ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನವನ್ನು ಅಲಂಕರಿಸಿದೆ. ಅಷ್ಟೇ ಅಲ್ಲದೆ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 1-0 ಮುನ್ನಡೆ ಪಡೆದಿದೆ.

ಈ ಗೆಲುವಿನೊಂದಿಗೆ ವಿರಾಟ್‌ ಕೊಹ್ಲಿ ನಾಯಕತ್ವದ ಭಾರತ ತಂಡ 14 ಅಂಕಗಳನ್ನು ಕಲೆ ಹಾಕಿ, ಪರಿಷ್ಕೃತಗೊಳಿಸಿರುವ ಐಸಿಸಿ ವಿಶ್ವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಅಗ್ರ ಸ್ಥಾನಕ್ಕೇರಿದೆ. ಪ್ರಸಕ್ತ ಆವೃತ್ತಿಯಲ್ಲಿ ಭಾರತ ಆಡಿರುವ ಎರಡು ಟೆಸ್ಟ್‌ ಪಂದ್ಯಗಳಲ್ಲಿ ಒಂದರಲ್ಲಿ ಗೆದ್ದು ಮತ್ತೊಂದು ಪಂದ್ಯದಲ್ಲಿ ಡ್ರಾಗೆ ತೃಪ್ತಿಪಟ್ಟುಕೊಂಡಿದೆ.

ಇನ್ನು ಅಷ್ಟೇ ಪಂದ್ಯಗಳನ್ನು ಆಡಿರುವ ಎದುರಾಳಿ ಇಂಗ್ಲೆಂಡ್‌ ತಂಡ ಎರಡು ಅಂಕಗಳೊಂದಿಗೆ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಮೂರನೇ ಸ್ಥಾನದಲ್ಲಿಯೇ ಉಳಿದಿದೆ. ಇನ್ನು ಭಾರತ ಹಾಗೂ ಇಂಗ್ಲೆಂಡ್‌ ತಂಡಗಳು ಆಗಸ್ಟ್ 25ರಂದು ಲೀಡ್ಸ್‌ನಲ್ಲಿ ನಡೆಯುವ ಮೂರನೇ ಟೆಸ್ಟ್‌ ಪಂದ್ಯದಲ್ಲಿ ಕಾದಾಟ ನಡೆಸಲಿವೆ.

120ಕ್ಕೆ ಆಲ್‌ಔಟ್‌!, ಇಂಗ್ಲೆಂಡ್‌ಗೆ ಹೀನಾಯ ಸೋಲಿನ ಬರೆ ಎಳೆದ ಭಾರತ

ಭಾರತ ಹಾಗೂ ಇಂಗ್ಲೆಂಡ್‌ ಜೊತೆಗೆ, ಪಾಕಿಸ್ತಾನ ಮತ್ತು ವೆಸ್ಟ್ ಇಂಡೀಸ್‌ತಂಡಗಳು ಕೂಡ ಎರಡನೇ ಆವೃತ್ತಿಯ ವಿಶ್ವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಅಭಿಯಾನ ಆರಂಭಿಸಿವೆ. ಭಾರತ ಹಾಗೂ ವೆಸ್ಟ್ ಇಂಡೀಸ್‌ ತಂಡಗಳು ಗೆಲುವು ದಾಖಲಿಸಿವೆ. ಆದರೆ, ಪಾಕಿಸ್ತಾನ ಮತ್ತು ಇಂಗ್ಲೆಂಡ್ ತಂಡಗಳು ಸೋಲು ಅನುಭವಿಸಿದ್ದು, ಮೊದಲನೇ ಗೆಲುವಿನ ತುಡಿತದಲ್ಲಿವೆ.

ಪಂದ್ಯದ ಗೆಲುವಿನ ಬಳಿಕ ವಿರಾಟ್‌ ಕೊಹ್ಲಿ, ತಮ್ಮ ಯೋಜನೆಗೆ ಅಂಟಿಕೊಂಡು, ಅರ್ಹ ಫಲಿತಾಂಶ ತಂದುಕೊಟ್ಟ ಸಹ ಆಟಗಾರರನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದರು.

‘ನಮ್ಮ ಯೋಜನೆ 60 ಓವರ್‌ಗಳಾಗಿತ್ತು’ ಲಾರ್ಡ್ಸ್‌ ಟೆಸ್ಟ್‌ ಭರ್ಜರಿ ಜಯದ ಬಳಿಕ ಕೊಹ್ಲಿ ಹೇಳಿದ್ದಿದು!

“ತಂಡದ ಬಗ್ಗೆ ತಂಬಾ ಹೆಮ್ಮೆ ಅನಿಸುತ್ತಿದೆ. ಪಂದ್ಯದ ಆರಂಭಿಕ ಮೂರು ದಿನಗಳು ಪಿಚ್‌ ಅಷ್ಟೊಂದು ಸಹಕಾರಿಯಾಗಿರಲಿಲ್ಲ. ಅದರಲ್ಲೂ ಮೊದಲನೇ ದಿನ ಸಿಕ್ಕಾಪಟ್ಟೆ ಸವಾಲುದಾಯಕವಾಗಿತ್ತು. ದ್ವಿತೀಯ ಇನಿಂಗ್ಸ್‌ನಲ್ಲಿ ಒತ್ತಡಕ್ಕೆ ಒಳಗಾಗಿದ್ದಾಗ ನಾವು ಆಡಿದ ಹಾದಿ ಅವರಲ್ಲೂ, ಜಸ್‌ಪ್ರಿತ್‌ ಹಾಗೂ ಶಮಿ ಆಟ ನಿಜಕ್ಕೂ ಅಸಾಧಾರಣವಾದದ್ದು. ಈ ವೇಳೆ ಎದುರಾಳಿಯನ್ನು 60 ಓವರ್‌ಗಳ ಒಳಗೆ ಆಲ್‌ಔಟ್‌ ಮಾಡುತ್ತೇವೆಂಬ ವಿಶ್ವಾಸವಿತ್ತು. ಎರಡನೇ ಇನಿಂಗ್ಸ್‌ನಲ್ಲಿ ಒತ್ತಡ ನಮಗೆ ನೆರವಾಗಿದೆ,” ಎಂದು ಕೊಹ್ಲಿ ತಿಳಿಸಿದ್ದಾರೆ.

“60 ಓವರ್‌ಗಳ ಒಳಗೆ ಪಂದ್ಯ ಮುಗಿಸುತ್ತೇವೆಂದು ನಾವು ನಿರ್ಧರಿಸಿದ್ದೆವು. ಹೊಸ ಚೆಂಡಿನಲ್ಲಿ ಅತ್ಯುತ್ತಮ ಆರಂಭ ಕಂಡಿದ್ದು, ಇಲ್ಲಿ ನಿರ್ಣಾಯಕವಾಯಿತು. ಪಿಚ್‌ನ ಸಹಕಾರ ಸಿಕ್ಕಿದ್ದಕ್ಕೆ ನಮಗೆ ತುಂಬಾ ಖುಷಿಯಾಯಿತು. ಅದರಲ್ಲೂ ವಿಶೇಷವಾಗಿ ವಿದೇಶಿ ಪಿಚ್‌ಗಳಲ್ಲಿ ಇಂತಹ ಸಂಗತಿಗಳು ನಮಗೆ ತಂಬಾನೇ ಮುಖ್ಯ,” ಎಂದು ಹೇಳಿದರು.

ನಮ್ಮ ಯೋಜನೆಯನ್ನು ಶಮಿ-ಬುಮ್ರಾ ಮಣ್ಣು ಪಾಲು ಮಾಡಿದರೆಂದ ರೂಟ್‌!

ದ್ವಿತೀಯ ಟೆಸ್ಟ್‌ ಪಂದ್ಯದ ಸಂಕ್ಷಿಪ್ತ ಸ್ಕೋರ್‌

ಭಾರತ: ಮೊದಲ ಇನಿಂಗ್ಸ್‌ 126.1 ಓವರ್‌ಗಳಲ್ಲಿ 364 ರನ್‌ಗಳಿಗೆ ಆಲ್‌ಔಟ್‌ (ರೋಹಿತ್‌ ಶರ್ಮಾ 83, ಕೆಎಲ್‌ ರಾಹುಲ್ 129, ಚೇತೇಶ್ವರ್‌ ಪೂಜಾರ 9, ವಿರಾಟ್ ಕೊಹ್ಲಿ 42, ಅಜಿಂಕ್ಯ ರಹಾನೆ 1, ರಿಷಭ್ ಪಂತ್ 37, ರವೀಂದ್ರ ಜಡೇಜಾ 39; ಜೇಮ್ಸ್‌ ಆಂಡರ್ಸನ್ 62ಕ್ಕೆ 5, ಓಲ್ಲೀ ರಾಬಿನ್ಸನ್‌ 73ಕ್ಕೆ 2, ಮಾರ್ಕ್‌ ವುಡ್‌ 91ಕ್ಕೆ 2).

ಇಂಗ್ಲೆಂಡ್: ಮೊದಲ ಇನಿಂಗ್ಸ್‌ 128 ಓವರ್‌ಗಳಲ್ಲಿ 391 ರನ್ (ರೋರಿ ಬರ್ನ್ಸ್‌ 49, ಡಾಮ್ ಸಿಬ್ಲೀ 11, ಜೋ ರೂಟ್‌ ಔಟಾಗದೆ 180, ಜಾನಿ ಬೈರ್‌ಸ್ಟೋವ್ 57; ಮೊಹಮ್ಮದ್‌ ಸಿರಾಜ್ 94ಕ್ಕೆ 4, ಇಶಾಂತ್‌ ಶರ್ಮಾ 69ಕ್ಕೆ 3, ಮೊಹಮ್ಮದ್‌ ಶಮಿ 95ಕ್ಕೆ 2).

ಭಾರತ: ಎರಡನೇ ಇನಿಂಗ್ಸ್‌ 109.3 ಓವರ್‌ಗಳಲ್ಲಿ 8 ವಿಕೆಟ್‌ಗೆ 298 ರನ್ ಡಿ. (ರೋಹಿತ್‌ ಶರ್ಮಾ 21, ವಿರಾಟ್ ಕೊಹ್ಲಿ 20, ಚೇತೇಶ್ವರ್‌ ಪೂಜಾರ 45, ಅಜಿಂಕ್ಯ ರಹಾನೆ 61, ಮೊಹಮ್ಮದ್‌ ಶಮಿ 58*, ರಿಷಭ್ ಪಂತ್ 22, ಇಶಾಂತ್‌ ಶರ್ಮಾ 16, ಜಸ್‌ಪ್ರೀತ್‌ ಬುಮ್ರಾ 34; ಮಾರ್ಕ್‌ ವುಡ್‌ 51ಕ್ಕೆ 3, ಮೊಯೀನ್‌ ಅಲಿ 84ಕ್ಕೆ 2, ಓಲ್ಲೀ ರಾಬಿನ್ಸನ್‌ 42ಕ್ಕೆ 2, ಸ್ಯಾಮ್‌ ಕರ್ರನ್ 42ಕ್ಕೆ 1).

ಇಂಗ್ಲೆಂಡ್: 2ನೇ ಇನಿಂಗ್ಸ್ 51.5 ಓವರ್‌ಗಳಲ್ಲಿ 120ಕ್ಕೆ ಆಲ್‌ಔಟ್‌ (ಜೋ ರೂಟ್‌ 33, ಜೋಸ್‌ ಬಟ್ಲರ್‌ 25; ಮೊಹಮ್ಮದ್ ಸಿರಾಜ್ 32ಕ್ಕೆ 4, ಜಸ್‌ಪ್ರೀತ್‌ ಬುಮ್ರಾ 33ಕ್ಕೆ 3, ಇಶಾಂತ್‌ ಶರ್ಮಾ 13ಕ್ಕೆ 2, ಮೊಹಮ್ಮದ್‌ ಶಮಿ 13ಕ್ಕೆ 1).

ಲಾರ್ಡ್ಸ್‌ನಲ್ಲಿ ಶತಕ ಸಿಡಿಸಿದ ಕನ್ನಡಿಗ ಕೆ.ಎಲ್‌ ರಾಹುಲ್‌ಗೆ ಪಂದ್ಯ ಶ್ರೇಷ್ಠ ಪ್ರಶಸ್ತಿ!


Source link

x

Check Also

ಶಾಲೆಗಳಲ್ಲಿ ಕಲಿಸುತ್ತಾರೆ ಜೀವನ ಪಾಠ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 23

ಈ ದೇಶಕ್ಕೆ ಬಂದ ಆರಂಭದಲ್ಲೇ ನಮ್ಮ ಕಂಪನಿಯವರು ಅಮೆರಿಕನ್ ಆಂಗ್ಲದ ಪರಿಚಯ ಮಾಡಿಸಲೆಂದೇ ESL – English as Second ...