Home » Kannada News » ಪೆಗಾಸಸ್‌: ಕೇಂದ್ರದ ಅಫಿಡವಿಟ್‌ಗೆ ಸುಪ್ರೀಂ ಅಸಮ್ಮತಿ, ಹೆಚ್ಚಿನ ಮಾಹಿತಿ ಕೇಳಿದ ನ್ಯಾಯಾಲಯ

ಪೆಗಾಸಸ್‌: ಕೇಂದ್ರದ ಅಫಿಡವಿಟ್‌ಗೆ ಸುಪ್ರೀಂ ಅಸಮ್ಮತಿ, ಹೆಚ್ಚಿನ ಮಾಹಿತಿ ಕೇಳಿದ ನ್ಯಾಯಾಲಯ

ಹೈಲೈಟ್ಸ್‌:

  • ಪೆಗಾಸಸ್‌ ಗೂಢಚರ್ಯೆ ಪ್ರಕರಣ ಕುರಿತು ಹೆಚ್ಚಿನ ವಿವರ ಬಯಸಿ ಕೇಂದ್ರ ಸರಕಾರಕ್ಕೆ ನೋಟಿಸ್‌ ಜಾರಿ ಮಾಡಿದ ಸುಪ್ರೀಂ ಕೋರ್ಟ್‌
  • ಸರಕಾರ ಸಲ್ಲಿಸಿರುವ ಎರಡು ಪುಟಗಳ ಸಂಕ್ಷಿಪ್ತ ಅಫಿಡವಿಟ್‌ನಲ್ಲಿ ಸಮಗ್ರ ಮಾಹಿತಿ ಇಲ್ಲ ಎಂದ ನ್ಯಾಯಾಲಯ
  • ರಾಷ್ಟ್ರೀಯ ಭದ್ರತೆಗೆ ಸಂಬಂಧಿಸಿದ ವಿಷಯ ಬಿಟ್ಟು ಉಳಿದ ಮಾಹಿತಿ ನೀಡಿ ಎಂದ ಕೋರ್ಟ್‌

ಹೊಸದಿಲ್ಲಿ: ಸಂಶಯದ ಬಿರುಗಾಳಿ ಎಬ್ಬಿಸಿರುವ ಪೆಗಾಸಸ್‌ ಗೂಢಚರ್ಯೆ ಪ್ರಕರಣ ಕುರಿತು ಹೆಚ್ಚಿನ ವಿವರ ಬಯಸಿ ಸುಪ್ರೀಂ ಕೋರ್ಟ್‌ ಮಂಗಳವಾರ ಕೇಂದ್ರ ಸರಕಾರಕ್ಕೆ ನೋಟಿಸ್‌ ಜಾರಿ ಮಾಡಿದೆ.

ಫೋನ್‌ ಕದ್ದಾಲಿಕೆಯ ಪೆಗಾಸಸ್‌ ಹಗರಣ ಬಗ್ಗೆ ಸ್ವತಂತ್ರ ತನಿಖೆಗೆ ಒತ್ತಾಯಿಸಿರುವ ಅರ್ಜಿಗಳ ವಿಚಾರಣೆ ಮುಂದುವರಿಸಿದ ಮುಖ್ಯ ನ್ಯಾಯಮೂರ್ತಿ ಎಂ.ಎನ್‌.ರಮಣ ನೇತೃತ್ವದ ತ್ರಿಸದಸ್ಯ ನ್ಯಾಯಪೀಠ, ಸರಕಾರ ಸಲ್ಲಿಸಿರುವ ಎರಡು ಪುಟಗಳ ಸಂಕ್ಷಿಪ್ತ ಅಫಿಡವಿಟ್‌ನಲ್ಲಿ ಸಮಗ್ರ ಮಾಹಿತಿ ಇಲ್ಲ ಎಂದು ಹೇಳಿದೆ.

“ಇದರಲ್ಲಿ ರಾಷ್ಟ್ರೀಯ ಭದ್ರತೆಯ ಜಟಿಲ ಸಂಗತಿ ಅಡಕವಾಗಿರುವುದರಿಂದ ಹೆಚ್ಚಿನ ಮಾಹಿತಿಯನ್ನು ಬಹಿರಂಗಪಡಿಸಲು ಆಗದು. ತಜ್ಞರ ಸಮಿತಿ ಮೂಲಕ ಸತ್ಯಾಸತ್ಯತೆಯ ವರದಿ ಪಡೆಯಲಾಗುವುದು,” ಎಂದು ಸರಕಾರ ಹೇಳಿದೆ. ಇದನ್ನು ಒಪ್ಪದ ನ್ಯಾಯಪೀಠ, “ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ತರುವ ವಿವರಗಳನ್ನು ಬಹಿರಂಗಪಡಿಸಿ ಎಂದು ನಾವು ಬಯಸುವುದಿಲ್ಲ. ಆದರೆ, ಅದನ್ನು ಹೊರತುಪಡಿಸಿದ ಸಂಗತಿಗಳ ವಿವರ ನೀಡಲು ಏನು ಅಡ್ಡಿ? ಸಮಗ್ರವಾದ ಅಫಿಡವಿಟ್‌ ಸಲ್ಲಿಕೆ ಮಾಡಿ. 10 ದಿನಗಳ ನಂತರ ವಿಚಾರಣೆ ಮುಂದುವರಿಸುತ್ತೇವೆ. ಈ ವಿಷಯದಲ್ಲಿ ಏನು ಮಾಡಬೇಕು ಎನ್ನುವುದನ್ನು ನಂತರ ಪರಿಶೀಲಿಸಲಾಗುವುದು,” ಎಂದು ಹೇಳಿತು.

ಪೆಗಾಸಸ್‌ ಆರೋಪಗಳು ಗಂಭೀರವಾಗಿವೆ – ಸುಪ್ರೀಂ ಕೋರ್ಟ್
ನ್ಯಾಯಮೂರ್ತಿಗಳಾದ ಸೂರ್ಯಕಾಂತ್‌ ಮತ್ತು ಅನಿರುದ್ಧ ಬೋಸ್‌ ಅವರನ್ನು ಒಳಗೊಂಡ ಪೀಠದ ಮುಂದೆ ಸಾಲಿಸಿಟರ್‌ ಜನರಲ್‌ ತುಷಾರ್‌ ಮೆಹ್ತಾ, ಸರಕಾರದ ನಿಲುವಿನ ಕುರಿತು ಇನ್ನಷ್ಟು ಸ್ಪಷ್ಟನೆ ನೀಡಿದರು. “ಸೋಮವಾರ ಸಲ್ಲಿಸಿದ ಅಫಿಡವಿಟ್‌ನಲ್ಲಿ ಸರಕಾರ ತನ್ನ ನಿಲುವನ್ನು ಖಚಿತಪಡಿಸಿದೆ. ಅದು ಸಂಕ್ಷಿಪ್ತ ಅಫಿಡವಿಟ್‌ ಆಗಿದ್ದರೂ ಹೇಳಬೇಕಾದದ್ದನ್ನೆಲ್ಲ ಹೇಳಿಯಾಗಿದೆ. ಹೆಚ್ಚು ಕೆದಕುವುದು ಬೇಡ. ಇದು ರಾಷ್ಟ್ರೀಯ ಭದ್ರತೆಗೆ ಸಂಬಂಧಿಸಿದ ನಾಜೂಕಿನ ವಿಷಯ. ನೀವು ನಮ್ಮ ದೃಷ್ಟಿಯಿಂದಲೂ ಅದನ್ನೊಮ್ಮೆ ನೋಡಿ,” ಎಂದು ಮನವಿ ಮಾಡಿದರು.

ಪೆಗಾಸಸ್‌ ವಿವಾದ: ವಿರೋಧ ಪಕ್ಷಗಳನ್ನು ಬೆಂಬಲಿಸಿದ ನಿತೀಶ್‌ ಕುಮಾರ್‌, ತನಿಖೆಗೆ ಆಗ್ರಹ
ಈ ವಿಷಯದಲ್ಲಿ ಸರಕಾರ ಯಾರಿಗೂ ಏನನ್ನೂ ಹೇಳಿಲ್ಲ. ಬಹಿರಂಗ ಚರ್ಚೆ ಬೇಡ ಎನ್ನುವುದಷ್ಟೇ ವಾದ ಎಂದು ಮೆಹ್ತಾ ಸ್ಪಷ್ಟಪಡಿಸಿದರು. ಅರ್ಜಿದಾರರಾದ ಹಿರಿಯ ಪತ್ರಕರ್ತ ಎನ್‌.ರಾಮ್‌ ಮತ್ತು ಶಶಿ ಕುಮಾರ್‌ ಪರ ವಾದ ಮಂಡಿಸಿದ ವಕೀಲ ಕಪಿಲ್‌ ಸಿಬಲ್‌ ಕೂಡ, “ಭದ್ರತೆಗೆ ಸಂಬಂಧಿಸಿದ ಯಾವುದೇ ವಿಷಯವನ್ನು ಸರಕಾರ ಬಹಿರಂಗ ಪಡಿಸುವುದು ಬೇಡ,” ಎಂದರು.


Source link

x

Check Also

ಶಾಲೆಗಳಲ್ಲಿ ಕಲಿಸುತ್ತಾರೆ ಜೀವನ ಪಾಠ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 23

ಈ ದೇಶಕ್ಕೆ ಬಂದ ಆರಂಭದಲ್ಲೇ ನಮ್ಮ ಕಂಪನಿಯವರು ಅಮೆರಿಕನ್ ಆಂಗ್ಲದ ಪರಿಚಯ ಮಾಡಿಸಲೆಂದೇ ESL – English as Second ...