Home » Kannada News » ರಷ್ಯಾ ಜಲಗಡಿ ಪ್ರವೇಶಿಸಲು ಯತ್ನಿಸಿದ ಅಮೆರಿಕದ ಯುದ್ಧ ನೌಕೆ?: 50 ನಿಮಿಷಗಳ ಆತಂಕದ ಕ್ಷಣಗಳು!

ರಷ್ಯಾ ಜಲಗಡಿ ಪ್ರವೇಶಿಸಲು ಯತ್ನಿಸಿದ ಅಮೆರಿಕದ ಯುದ್ಧ ನೌಕೆ?: 50 ನಿಮಿಷಗಳ ಆತಂಕದ ಕ್ಷಣಗಳು!

ಹೈಲೈಟ್ಸ್‌:

  • ರಷ್ಯಾ ಜಲಗಡಿ ಪ್ರವೇಶಿಸಿತಾ ಅಮೆರಿಕದ ಯುದ್ಧ ಹಡಗು?
  • ಅಮೆರಿಕದ ಯುಎಸ್‌ಎಸ್‌ ಚಾಫಿ ಯುದ್ಧ ನೌಕೆ ಹಿಮ್ಮೆಟ್ಟಿಸಿದ ರಷ್ಯಾ?
  • ಜಪಾನ್ ಸಮುದ್ರದಲ್ಲಿ ರಷ್ಯಾ-ಚೀನಾ ಜಂಟಿ ನೌಕಾ ಸಮರಾಭ್ಯಾಸ.
  • ಅಮೆರಿಕದಿಂದ ಇದುವರೆಗೂ ಬಾರದ ಅಧಿಕೃತ ಹೇಳಿಕೆ.

ಮಾಸ್ಕೋ: ಚೀನಾದೊಂದಿಗಿನ ನೌಕಾ ಸಮರಾಭ್ಯಾಸದ ವೇಳೆ ತನ್ನ ಸಮುದ್ರ ಗಡಿ ದಾಟಲು ಪ್ರಯತ್ನಿಸಿದ ಅಮೆರಿಕದ ಯುದ್ಧ ಹಡಗನ್ನು ಓಡಿಸಿರುವುದಾಗಿ ರಷ್ಯಾ ಪ್ರತಿಪಾದಿಸಿದೆ.

ಚೀನಾ ಹಾಗೂ ರಷ್ಯಾ ಜಂಟಿ ನೌಕಾ ಸಮರಾಭ್ಯಾಸ ನಡೆಸುತ್ತಿದ್ದು, ಈ ವೇಳೆ ಅಮೆರಿಕದ ಯುದ್ಧ ಹಡಗೊಂದು ತನ್ನ ಪ್ರಾದೇಶಿಕ ಜಲಗಡಿಯನ್ನು ದಾಟಲು ಪ್ರಯತ್ನಿಸಿದೆ ಎಂದು ರಷ್ಯಾದ ರಕ್ಷಣಾ ಇಲಾಖೆ ಮಾಹಿತಿ ನೀಡಿದೆ.

ಅಮೆರಿಕದ ಯುಎಸ್‌ಎಸ್‌ ಚಾಫಿ ಹೆಸರಿನ ಯುದ್ಧ ಹಡಗು ತನ್ನ ಪ್ರಾದೇಶಿಕ ಜಲಗಡಿಯನ್ನು ಪ್ರವೇಶಿಸಲು ಪ್ರಯತ್ನಿಸಿತ್ತು. ಆದರೆ
ನಮ್ಮ ಅಡ್ಮಿರಲ್ ಟ್ರೈಬಟ್ಸ್ ಯುದ್ಧ ನೌಕೆ ಸೂಕ್ತ ಸಮಯದಲ್ಲಿ ಎಚ್ಚರಿಕೆ ಸಂದೇಶ ರವಾನಿಸಿ, ಚಾಫಿಯನ್ನು ಹಿಂದಕ್ಕೆ ತಳ್ಳಿತು ಎಂದು ರಷ್ಯಾ ರಕ್ಷಣಾ ಇಲಾಖೆ ಹೇಳಿದೆ.

ಅಕ್ರಮವಾಗಿ ಜಲಗಡಿ ಪ್ರವೇಶಿಸಿದ್ದ ಅಮೆರಿಕ ಯುದ್ಧ ನೌಕೆಯನ್ನು ಬೆನ್ನಟ್ಟಿ ಓಡಿಸಿದ್ದೇವೆ: ರಷ್ಯಾ!
ಆದರೆ ಕಡಿಮೆ ಅವಧಿಯಲ್ಲಿ ಚಾಫಿ ತನ್ನ ವೇಗ ಮತ್ತು ಪಥಯನ್ನು ಬದಲಿಸಲು ಸಾಧ್ಯವಾಗದೇ ಸಂಕಷ್ಟಕ್ಕೆ ಸಿಲುಕಿತು ಎನ್ನಲಾಗಿದೆ. ಈ ವೇಳೆ ಎಚ್ಚರಿಕೆ ಸಂದೇಶ ರವಾನಿಸಲು ಬಂದಿದ್ದ ನಮ್ಮ ಅಡ್ಮಿರಲ್ ಟ್ರೈಬಟ್ಸ್ ಯುದ್ಧ ನೌಕೆ ಕೇವಲ 60 ಮೀಟರ್ ದೂರದಲ್ಲಿತ್ತು ಎಂದು ರಷ್ಯಾ ತಿಳಿಸಿದೆ.

ಏಕಾಏಕಿ ಚಾಫಿ ಯುದ್ಧ ನೌಕೆ ತನ್ನ ಜಲಗಡಿ ಹತ್ತಿರ ಬಂದಿದ್ದು, ನೌಕಾ ಸಮರಾಭ್ಯಸದಲ್ಲಿ ನಿರತವಾಗಿದ್ದ ನಮ್ಮ ಯುದ್ಧ ನೌಕೆಗಳು ಕೂಡಲೇ ಕಾರ್ಯಪ್ರವೃತ್ತವಾಗಿದ್ದರಿಂದ ಚಾಫಿಯನ್ನು ಹಿಮ್ಮೆಟ್ಟಿಸಲು ಸಾಧ್ಯವಾಯಿತು ಎಂದು ರಷ್ಯಾದ ರಕ್ಷಣಾ ಇಲಾಖೆ ಅಧಿಕಾರಿಗಳು ಪ್ರತಿಪಾದಿಸಿದ್ದಾರೆ.

ಜಪಾನ್ ಸಮುದ್ರದ ಪಶ್ಚಿಮದಲ್ಲಿ ವ್ಲಾಡಿವೋಸ್ಟಾಕ್‌ನ ದಕ್ಷಿಣಕ್ಕೆ ಇರುವ ಪೀಟರ್ ದಿ ಗ್ರೇಟ್ ಕೊಲ್ಲಿಯಲ್ಲಿ ಈ ಘಟನೆ ನಡೆದಿದ್ದು, ಒಟ್ಟು 50 ನಿಮಿಷಗಳವರೆಗೆ ಆತಂಕದ ಪರಿಸ್ಥಿತಿ ನಿರ್ಮಾಣವಾಗಿತ್ತು ಎಂದು ರಷ್ಯಾ ತನ್ನ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ. ಆದರೆ ಅಮೆರಿಕ ಇದುವರೆಗೂ ಈ ಕುರಿತು ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.

ಜಲಮಾರ್ಗದಲ್ಲಿ ಅತಿಕ್ರಮ ಪ್ರವೇಶ: ಬ್ರಿಟನ್ ನೌಕಾಪಡೆ ಹಡಗಿನತ್ತ ಗುಂಡು ಹಾರಿಸಿ ಎಚ್ಚರಿಕೆ ನೀಡಿದ ರಷ್ಯಾ
ನಾಲ್ಕು ತಿಂಗಳ ಅವಧಿಯಲ್ಲಿ ಎರಡನೇ ಬಾರಿಗೆ ರಷ್ಯಾ ತನ್ನ ಜಲಗಡಿಯಿಂದ ನ್ಯಾಟೋ ಸದಸ್ಯ ರಾಷ್ಟ್ರಗಳ ಯುದ್ಧ ನೌಕೆಯನ್ನು ಹಿಮ್ಮೆಟ್ಟಿಸಿರುವುದಾಗಿ ಹೇಳಿಕೊಂಡಿದೆ. ಕಳೆದ ಜೂನ್‌ನಲ್ಲಿ ಬ್ರಿಟಿಷ್ ವಿಧ್ವಂಸಕ ಯುದ್ಧ ಹಡಗನ್ನು ಕಪ್ಪು ಸಮುದ್ರದ ತನ್ನ ಪ್ರಾದೇಶಿಕ ಜಲಗಡಿಯಿಂದ ಹಿಮ್ಮೆಟ್ಟಿಸಿದ್ದಾಗಿ ರಷ್ಯಾ ಹೇಳಿತ್ತು. ಆದರೆ ರಷ್ಯಾದ ಈ ವಾದವನ್ನು ಬ್ರಿಟನ್ ತಳ್ಳಿ ಹಾಕಿತ್ತು.


Source link

x

Check Also

ಮೈಸೂರು ಅತ್ಯಾಚಾರ ಪ್ರಕರಣ: ನಾನು ಉಡಾಫೆ ಹೇಳಿಕೆಗಳನ್ನು ನೀಡೊಲ್ಲ ಎಂದ ಸಚಿವ ಸೋಮಣ್ಣ

ಹೈಲೈಟ್ಸ್‌: ಮೈಸೂರಿನಲ್ಲಿ ನಡೆದಿದ್ದ ಸಾಮೂಹಿಕ ಅತ್ಯಾಚಾರ ಪ್ರಕರಣ ವಿಚಾರ ರಾಜಕೀಯ ಪಕ್ಷಗಳು, ನಾಯಕರ ನಡುವಿನ ಮಾತಿನ ಸಮರ ಉಡಾಫೆಯ ಹೇಳಿಕೆಗಳನ್ನು ...