Home » Kannada News » ರಾಹುಲ್‌ ಮೇಲೆ ಬಾಟಲ್‌ ಕಾರ್ಕ್‌ ಎಸೆದು ದುರ್ವರ್ತನೆ ತೋರಿದ ಪ್ರೇಕ್ಷಕರು!

ರಾಹುಲ್‌ ಮೇಲೆ ಬಾಟಲ್‌ ಕಾರ್ಕ್‌ ಎಸೆದು ದುರ್ವರ್ತನೆ ತೋರಿದ ಪ್ರೇಕ್ಷಕರು!

ಹೈಲೈಟ್ಸ್‌:

  • ಭಾರತ ಹಾಗೂ ಇಂಗ್ಲೆಂಡ್ ನಡುವೆ ನಡೆಯುತ್ತಿರುವ ಎರಡನೇ ಟೆಸ್ಟ್‌ ಪಂದ್ಯ.
  • ಆರಂಭಿಕ ಕೆ.ಎಲ್‌ ರಾಹುಲ್‌ ಮೇಲೆ ಬಾಟಲ್‌ ಕಾರ್ಕ್‌ ಎಸೆದ ಪ್ರೇಕ್ಷಕರು.
  • ಈ ಘಟನೆಯಿಂದ ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿ ಆಕ್ರೋಶ.

ಲಂಡನ್‌: ಭಾರತ ಹಾಗೂ ಇಂಗ್ಲೆಂಡ್‌ ನಡುವಿನ ಎರಡನೇ ಟೆಸ್ಟ್‌ ಪಂದ್ಯದ ಮೂರನೇ ದಿನ ಸ್ಥಳೀಯ ಅಭಿಮಾನಿಗಳ ಗುಂಪೊಂದು ಅನುಚಿತ ವರ್ತನೆ ತೋರಿದೆ. ಥರ್ಡ್‌ ಮ್ಯಾನ್‌ ಬೌಂಡರಿ ಬಳಿ ಕ್ಷೇತ್ರ ರಕ್ಷಣೆ ಮಾಡುತ್ತಿದ್ದ ಟೀಮ್‌ ಇಂಡಿಯಾ ಆರಂಭಿಕ ಕೆ.ಎಲ್‌ ರಾಹುಲ್‌ ಮೇಲೆ ಪ್ರೇಕ್ಷಕರು ಬಾಟಲ್‌ ಕಾರ್ಕ್‌ಗಳನ್ನು ಎಸೆದು ದುರ್ವರ್ತನೆ ಮೆರೆದಿದ್ದಾರೆ.

ಇಲ್ಲಿನ ಇತಿಹಾಸ ಪ್ರಸಿದ್ದ ಲಾರ್ಡ್ಸ್ ಅಂಗಳದಲ್ಲಿ ನಡೆದ ಈ ಘಟನೆಯ ಫೋಟೋ ಹಾಗೂ ವಿಡಿಯೋ ಟ್ವಿಟರ್‌ ಸೇರಿದಂತೆ ಸೋಶಿಯಲ್‌ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್‌ ಆಗಿದೆ. ಇಂಗ್ಲೆಂಡ್‌ ಪ್ರೇಕ್ಷಕರ ಈ ವರ್ತನೆಗೆ ಭಾರತೀಯ ಕ್ರಿಕೆಟ್‌ ಅಭಿಮಾನಿಗಳು ರೋಸಿ ಹೋಗಿದ್ದು, ಸೋಶಿಯಲ್‌ ಮೀಡಿಯಾದಲ್ಲಿ ತಮ್ಮ ಆಕ್ರೋಶವನ್ನು ಹೊರ ಹಾಕಿದ್ದಾರೆ.

ಇಂಗ್ಲೆಂಡ್‌ ತಂಡದ ಪ್ರಥಮ ಇನಿಂಗ್ಸ್‌ನ 69ನೇ ಓವರ್‌ನಲ್ಲಿ ಈ ಘಟನೆ ನಡೆದಿತ್ತು. ಪ್ರೇಕ್ಷಕರ ಅನುಚಿತ ವರ್ತನೆ ಬಗ್ಗೆ ಕೆ.ಎಲ್‌ ರಾಹುಲ್‌, ನಾಯಕ ವಿರಾಟ್‌ ಕೊಹ್ಲಿಗೆ ದೂರು ನೀಡಿದ್ದರು. ಇದರಿಂದ ಆಕ್ರೋಶಗೊಂಡ ಕೊಹ್ಲಿ, ಅವುಗಳನ್ನು ಪುನಃ ಪ್ರೇಕ್ಷಕರಿಗೆ ಎಸೆಯಿರಿ ಎಂದು ರಾಹುಲ್‌ಗೆ ಸನ್ನೆ ಮಾಡಿ ಹೇಳಿದ್ದರು.

IND vs ENG: ಸಿರಾಜ್‌ ತಂತ್ರಕ್ಕೆ ಶರಣಾದ ಜಾನಿ, ಇಂಗ್ಲೆಂಡ್‌ಗೆ ರೂಟ್‌ ಶತಕದ ಬಲ!

ಇಂಗ್ಲೆಂಡ್‌ ಅಭಿಮಾನಿಗಳ ಇಂತಹ ವರ್ತನೆ ಸ್ವೀಕಾರಾರ್ಹವಲ್ಲ. ಅದರಲ್ಲೂ ಪಂದ್ಯದ ಸಮಯದಲ್ಲಿ ಈ ರೀತಿ ಮಾಡುವುದು ನಿಜಕ್ಕೂ ಬೇಸರದ ಸಂಗತಿ. ಈ ವೇಳೆ ಮಧ್ಯೆ ಪ್ರವೇಶಿಸಿದ ಭದ್ರತಾ ಅಧಿಕಾರಿಗಳು ಪರಿಸ್ಥಿತಿಯನ್ನು ಸರಿದೂಗಿಸಿದರು. ಇದೆಲ್ಲದರ ಹೊರತಾಗಿಯೂ ಟೀಮ್‌ ಇಂಡಿಯಾ ಆಟಗಾರರು ತಾಳ್ಮೆಯಿಂದ ಆಟದ ಕಡೆ ಗಮನಹರಿಸಿದರು.

ರೂಟ್‌ 22ನೇ ಶತಕ

ಅಂದಹಾಗೆ, ಮೂರನೇ ದಿನ ಟೀ ವಿರಾಮದ ಹೊತ್ತಿಗೆ ನಾಯಕ ಜೋ ರೂಟ್‌ ಅವರ 22ನೇ ಟೆಸ್ಟ್ ಶತಕದ ನೆರವಿನಿಂದ ಇಂಗ್ಲೆಂಡ್‌ ತಂಡ ಪ್ರಥಮ ಇನಿಂಗ್ಸ್‌ನಲ್ಲಿ 98 ಓವರ್‌ಗಳಿಗೆ ಐದು ವಿಕೆಟ್‌ ನಷ್ಟಕ್ಕೆ 314 ರನ್‌ ಗಳಿಸಿದ್ದು, ಭಾರತ ತಂಡದಿಂದ ಕೇವಲ 50 ರನ್‌ ಹಿಂದಿದೆ.

ಪ್ರಥಮ ಇನಿಂಗ್ಸ್ ಆರಂಭದಲ್ಲಿ ಪ್ರಮುಖ ಮೂರು ವಿಕೆಟ್‌ಗಳನ್ನು ಕಳೆದುಕೊಂಡಿದ್ದ ಇಂಗ್ಲೆಂಡ್‌ ತಂಡಕ್ಕೆ ಮೂರನೇ ದಿನ ಜೋ ರೂಟ್‌ ಹಾಗೂ ಜಾನಿ ಬೈರ್‌ಸ್ಟೋವ್‌ ಆಸರೆಯಾದರು. ಈ ಜೋಡಿ ಮುರಿಯದ ನಾಲ್ಕನೇ ವಿಕೆಟ್‌ಗೆ 121 ರನ್‌ ಜೊತೆಯಾಟವಾಡುವ ಮೂಲಕ ತಂಡವನ್ನು ಸುಭದ್ರ ಸ್ಥಿತಿಗೆ ತಲುಪಿಸಿತು. ನಾಯಕನಿಗೆ ಮತ್ತೊಂದು ತುದಿಯಲ್ಲಿ ಅತ್ಯುತ್ತಮ ಸಾಥ್‌ ನೀಡಿದ ಜಾನಿ ಬೈರ್‌ಸ್ಟೋವ್‌ 57 ರನ್‌ ಗಳಿಸಿದ್ದರು. ಆದರೆ, ಮೊಹಮ್ಮದ್‌ ಸಿರಾಜ್‌ ಅವರ ಶಾರ್ಟ್‌ ಪಿಚ್‌ ತಂತ್ರಕ್ಕೆ ಬಲಿಯಾದರು.

ಮತ್ತೊಂದು ತುದಿಯಲ್ಲಿ ಗಟ್ಟಿಯಾಗಿ ನಿಂತು ಬ್ಯಾಟ್‌ ಮಾಡಿದ ಜೋ ರೂಟ್‌ ಭಾರತೀಯ ಮಾರಕ ದಾಳಿಯನ್ನು ಸಮರ್ಥವಾಗಿ ಎದುರಿಸಿದರು. ಆಡಿದ 237 ಎಸೆತಗಳಲ್ಲಿ 132 ರನ್‌ ಗಳಿಸಿದರು. ಆ ಮೂಲಕ ಟೆಸ್ಟ್‌ ವೃತ್ತಿ ಜೀವನದ 22ನೇ ಶತಕ ಸಿಡಿಸಿ ತವರು ಅಭಿಮಾನಿಗಳ ಪ್ರೀತಿಗೆ ಪಾತ್ರರಾದರು. ಅಲ್ಲದೆ, ಪ್ರಸ್ತುತ ಟೆಸ್ಟ್ ಸರಣಿಯ ಸತತ ಇನಿಂಗ್ಸ್‌ಗಳಲ್ಲಿ ಎರಡು ಶತಕ ಸಿಡಿಸಿದ ಕೀರ್ತಿಗೆ ರೂಟ್‌ ಭಾಜನರಾದರು.

ಇದೀಗ ಜೋ ರೂಟ್‌ ಜೊತೆಗೆ ಮತ್ತೊಂದು ತುದಿಯಲ್ಲಿ ಮೊಯೀನ್‌ ಅಲಿ(20) ಬ್ಯಾಟಿಂಗ್‌ ಮುಂದುವರಿಸಿದ್ದಾರೆ. ಭಾರತದ ಪರ ಮೂರನೇ ದಿನ ಅತ್ಯುತ್ತಮ ಬೌಲ್‌ ಮಾಡಿದ ಮೊಹಮ್ಮದ್‌ ಸಿರಾಜ್‌ ಹಾಗೂ ಇಶಾಂತ್‌ ಶರ್ಮಾ ತಲಾ ಒಂದೊಂದು ವಿಕೆಟ್‌ ಪಡೆದುಕೊಂಡರು.


Source link

x

Check Also

ಶಾಲೆಗಳಲ್ಲಿ ಕಲಿಸುತ್ತಾರೆ ಜೀವನ ಪಾಠ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 23

ಈ ದೇಶಕ್ಕೆ ಬಂದ ಆರಂಭದಲ್ಲೇ ನಮ್ಮ ಕಂಪನಿಯವರು ಅಮೆರಿಕನ್ ಆಂಗ್ಲದ ಪರಿಚಯ ಮಾಡಿಸಲೆಂದೇ ESL – English as Second ...