Home » Kannada News » ಶಾಲೆಗಳಲ್ಲಿ ಕಲಿಸುತ್ತಾರೆ ಜೀವನ ಪಾಠ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 23

ಶಾಲೆಗಳಲ್ಲಿ ಕಲಿಸುತ್ತಾರೆ ಜೀವನ ಪಾಠ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 23

ಈ ದೇಶಕ್ಕೆ ಬಂದ ಆರಂಭದಲ್ಲೇ ನಮ್ಮ ಕಂಪನಿಯವರು ಅಮೆರಿಕನ್ ಆಂಗ್ಲದ ಪರಿಚಯ ಮಾಡಿಸಲೆಂದೇ ESL – English as Second Language ಎಂಬ ಕೋರ್ಸ್‌ಗೆ ಕಳುಹಿಸಿದ್ದರು. J Sargeant Reynold Community College ಕೇವಲ ಐವತ್ತು ವರ್ಷ ಇತಿಹಾಸ ಇರುವ ಒಂದು ಕಮ್ಯೂನಿಟಿ ಕಾಲೇಜು. ಹಲವು ಎರಡು ವರ್ಷದ ಡಿಗ್ರಿ ಕೋರ್ಸ್ ಬಿಟ್ಟರೆ ಮಿಕ್ಕೆಲ್ಲವೂ ಸರ್ಟಿಫಿಕೇಟ್ ಮತ್ತು ಟೆಕ್ನಿಕಲ್ ತರಗತಿಗಳು ಅರ್ಧ ವಾರ್ಷಿಕ ಮತ್ತು ಒಂದು ವರ್ಷಕ್ಕೂ ಕಡಿಮೆ ಅವಧಿಯ ತರಗತಿಗಳು. ಇಲ್ಲಿ ಕಂಪ್ಯೂಟರ್ ಸಂಬಂಧಿ ತರಗತಿಗಳು ಇರುವಂತೆ, ಕಾಮರ್ಸ್ ಕೂಡ ಇರುತ್ತದೆ ಅಷ್ಟೇ ಅಲ್ಲದೆ plumbing, ಫೋಟೋಗ್ರಫಿ ಎಂಬ ಕೋರ್ಸ್‌ಗಳೂ ಲಭ್ಯ. ನಿಮಗೇನು ಬೇಕೋ ಅದು. ಇಲ್ಲಿನ ಲೆಕ್ಚರರ್‌ಗಳು ಪಿ.ಎಚ್.ಡಿ ಮಾಡಿರುವವರು ಇರುತ್ತಾರೆ. ಹಗಲಿನಲ್ಲಿ ತಮ್ಮ ಕೆಲಸ ಮಾಡುವವರು ಸಂಜೆಯಲ್ಲಿ ಇಲ್ಲಿ ಪಾಠ ಮಾಡುವವರು ಇರುತ್ತಾರೆ. ಬಹುಶಃ ಈ ESL ಕೋರ್ಸ್ ಅನ್ನು ಮೂರು ತಿಂಗಳ ಕಾಲ ಕಲಿತಿದ್ದೆ ಅಂತ ನೆನಪು. Pronunciation / Phonetics ಇಲ್ಲಿನ ಮುಖ್ಯವಾದ ಅಂಶ.

ಯಾವುದೇ ದೇಶದವರಿಗೆ ಮತ್ತೋರ್ವ ದೇಶದವರ ಭಾಷೆ ಬೇಗ ಅರಿವಾಗದೇ ಹೋಗುವುದರ ಹಿಂದೆ ಈ pronunciation ಇದೆ. ಒಂದೆರಡು ಉದಾಹರಣೆ ಹೇಳಿದರೆ Record ಎಂಬ ಪದ. ಇದೊಂದು ನಾಮಪದ ಮತ್ತು ಕ್ರಿಯಾಪದವೂ ಹೌದು. ರೆಕಾರ್ಡ್ ಎಂದು ಹೇಳಿದಾಗ ದಾಖಲೆ ಪತ್ರಗಳು ಎಂಬ ಅರ್ಥ ಬರುತ್ತದೆ. ರೆಕಾರ್ಡ್ ಎಂದು ಹೇಳಿದಾಗ ಧ್ವನಿ ಮುದ್ರಣ ಎಂದಾಗುತ್ತದೆ. Customers ಜೊತಗಿನ ನಿತ್ಯ ವ್ಯವಹಾರಕ್ಕೆ ಇಲ್ಲಿನ ಆಂಗ್ಲ ಮುಖ್ಯವಾಗಿತ್ತು. ಬದುಕಿನ ಇನ್ನೊಂದು ಮಜಲು ಅಂದೇ ಆರಂಭವಾಗಿತ್ತು. ಕಲಿಕೆಗೆ ಕೊನೆಯೆಲ್ಲಿ?

ಇಷ್ಟೆಲ್ಲಾ ವಿಷಯ ಯಾಕೆ ಹೇಳಿದೆ ಅಂದ್ರೆ, ನನ್ನ ಮುಂದಿನ ಓದಿಗೆ ಮತ್ತೆ ಇದೇ community collegeಗೆ ಹೋಗುವುದು ಎಂದು ನಿರ್ಧಾರ ಮಾಡಿದ್ದೆ. ಇದಕ್ಕೂ ಒಂದು ದೊಡ್ಡ ಕಾರಣವಿದೆ. ಯಾವುದಾದರೂ ದೊಡ್ಡ ಓದಿಗೆ ಕೈಹಾಕಿ ದುಡ್ಡು ತೆತ್ತ ಮೇಲೆ, ನನ್ನ ಪ್ರಾಜೆಕ್ಟ್ ಮುಗಿದು ವಾಪಸ್ ಬರುವಂತೆ ಆದರೆ, ಸಾವಿರಾರು ಡಾಲರ್ ಕೈಜಾರಿದಂತೆ ಅಲ್ಲವೇ? ಹೀಗಾಗಿ ಆರು ತಿಂಗಳ ಕಾಲೇಜಿಗೆ ಹೋಗಿ ಕಲಿಯುವುದು ಒಳಿತು. ಸರಿ ಅಂತ ಕಾಲೇಜಿಗೆ ಹೋಗಿ catalog ತಂದು ಯಾವ ಯಾವ ಕೋರ್ಸ್‌ಗಳು ಇದೆ ಮತ್ತು ಯಾವ ದಿನಗಳು ನಡೆಯುತ್ತದೆ ಎಂದು ನೋಡಿ Java ಓದನ್ನು ಆಯ್ದುಕೊಂಡೆ. ಹೀಗೆ ಕ್ಯಾಟಲಾಗ್ ನೋಡುವಾಗ ನನ್ನಾಕೆಗೆ Accountancy ಸಂಬಂಧಿ ಕೋರ್ಸ್ ಇಷ್ಟವಾಯ್ತು. ಈ ಎರಡೂ ತರಗತಿಗಳು ಬೇರೆ ಬೇರೆ ದಿನಗಳು ಇದೆ ಎಂದಾದ ಮೇಲೆ ಇಬ್ಬರೂ ಕಾಲೇಜಿಗೆ ಸೇರಿಯೇ ಬಿಟ್ಟೆವು. ತರಗತಿಗಳು ಸಂಜೆ ಆರೂವರೆಯಿಂದ ಒಂಬತ್ತೂವರೆಯವರೆಗೂ ನಡೆಯುತ್ತದೆ. ಮಗನನ್ನು ನೋಡಿಕೊಳ್ಳಬೇಕಾದುದು ಇದ್ದುದರಿಂದ ಇಬ್ಬರ ತರಗತಿಗಳು ಭಿನ್ನ ದಿನಗಳಲ್ಲಿ ಇರುವುದು ಅತೀ ಮುಖ್ಯವಾಗಿತ್ತು.

ಗಾಬರಿ ಹುಟ್ಟಿಸಿದ್ದ ಗ್ಯಾಸ್‌ ಸ್ಟೇಷನ್‌ಗಳು..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 19
ಮೊದಲ ದಿನದ ಕ್ಲಾಸಿಗೆ ನಾನು ಹೋಗಿ ಬಂದ ಮೇಲೆ, ಮರು ದಿನ ನನ್ನಾಕೆಯನ್ನು ತಂದೆ – ಮಗ ಇಬ್ಬರೂ ಡ್ರಾಪ್ ಮಾಡಿ ಬಂದೆವು. ಮೊದಲ ತರಗತಿಗಳ ಜೊತೆಗೆ ರಾಶಿ assignments ಕೈಲಿತ್ತು. ಇಬ್ಬರೂ homework ಮಾಡುವಾಗ ಒಂದೇ ದಿನದಲ್ಲಿ ಮಗನ ಕಡೆ ಗಮನ ಕೊಡಲಾಗಲಿಲ್ಲ ಎಂಬ ಬಿಸಿ ತಟ್ಟಿತ್ತು. ಕಾಲೇಜಿನ ನಿಯಮದ ಪ್ರಕಾರ ಒಂದು ತರಗತಿಯಾದ ಮೇಲೆ drop-out ಆಗಬೇಕು ಎಂದರೆ ಪೂರ್ತಿ ಹಣ ವಾಪಸ್ ಕೊಡುತ್ತಾರೆ. ಇಬ್ಬರಲ್ಲಿ ಯಾರು ಡ್ರಾಪ್ ಔಟ್ ಆಗುವುದು ಎಂಬ ಚರ್ಚೆ ಜಾಸ್ತಿ ಹೊತ್ತು ನಡೆಯಲಿಲ್ಲ. ನೆಚ್ಚಿನ ಸಬ್ಜೆಕ್ಟ್ ಓದಬೇಕು ಎಂಬ ಆಸಕ್ತಿ ತೋರಿದ ಧರ್ಮಪತ್ನಿಗೆ ಮೊದಲ ಆದ್ಯತೆ ನೀಡಿ ನಾನು ಹಿಂದೆ ಸರಿದೆ. ದಿನದ ಎಂಟು ಘಂಟೆಗಳ ಕಾಲ ನನ್ನ ಕೆಲಸ. ವಾರಕ್ಕೆ ಎರಡು – ಮೂರು ದಿನಗಳ ಕಾಲ ಅರ್ಧ ದಿನ ಮಗನ ಪ್ರಿ – ಸ್ಕೂಲ್ ಓದು. ಮಗನ ಕೆಲಸಗಳ ಜೊತೆ ನನ್ನಾಕೆಯ ಓದುವಿಕೆಯು ಬೆಳಗಿನ ಕೆಲಸಗಳಲ್ಲಿ ಒಂದಾಯ್ತು. ತರಗತಿ ಇದ್ದಾಗ ಕಾರಿನಲ್ಲಿ ಮಗನೊಡನೆ ಹೋಗಿ ಡ್ರಾಪ್ ಮಾಡಿ, ಅಲ್ಲೊಂದು ರೌಂಡ್ ಓಡಾಡಿ ಮನೆಗೆ ಹಿಂದಿರುಗುವುದು ನಮ್ಮ ಕೆಲಸದಲ್ಲಿ ಒಂದಾಯ್ತು. ಮರು ವರ್ಷದಲ್ಲಿ ನಾನು ತರಗತಿಗೆ ಸೇರಿ ಕೋರ್ಸ್ ಮಾಡಿದ್ದರೂ, ಮಗನ ಬಾಯಲ್ಲಿ ಆ ಕಾಲೇಜು ‘ಅಮ್ಮನ ಕಾಲೇಜು’ ಅಂತಲೇ ಇತ್ತು.

ಮಗನ ಪ್ರಿ-ಸ್ಕೂಲ್ ಅಂತ ಹೇಳಿದ ಮೇಲೆ, ಹಲವಾರು ಓದುಗರ ಆಸಕ್ತಿದಾಯಕ ವಿಷಯ ಹೇಳಲೇಬೇಕು. ಅದುವೇ ಇಲ್ಲಿನ education ಸಿಸ್ಟಮ್. ಶಾಲೆಯಲ್ಲಿ ಈ ಮಕ್ಕಳಿಗೆ ಏನು ಕಲಿಸಲಾಗುತ್ತದೆ? ಶಾಲೆಗೇ ಹೋಗಿ ಬಂದ ಮಕ್ಕಳನ್ನು ಏನು ಮಾಡಿದಿರಿ ಪ್ರಿ-ಸ್ಕೂಲ್ ಶಾಲೆಯಲ್ಲಿ ಅಂತ ಕೇಳಿದರೆ, ಹೆಚ್ಚಿನ ಮಕ್ಕಳು ಹೇಳುವುದೇ ‘ಏನೂ ಇಲ್ಲ’ ಅಂತ ! ಎಂಥಾ ಶಾಕಿಂಗ್ ಅಲ್ವ? ‘ಇಂಡಿಯಾದಲ್ಲಿ ನಿನ್ನ ವಯಸ್ಸಿನ ಮಕ್ಕಳು ಟೇಬಲ್ಸ್ ಹೇಳ್ತಾರೆ, ನಂಬರ್ಸ್ ಹೇಳ್ತಾರೆ’ ಹಂಗೆ ಹಿಂಗೇ ಅಂತೆಲ್ಲಾ ಹೋಲಿಸುವ ಮಾತಾ ಪಿತೃಗಳಿಗೆ ಲೆಕ್ಕವೇ ಇಲ್ಲ. ಇರಲಿ ಹಾಗಿದ್ರೆ ಇವರು ಕಲಿಯೋದೇನು?

ಚಂಡಮಾರುತದ ರೌದ್ರ ರೂಪ ಕಂಡಾಗ.. ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 20
ಶಾಲೆಯಲ್ಲಿ ಟೀಚರ್ ಪ್ರಶ್ನೆ ಕೇಳಿದಾಗ ಧಡಾರನೆ ಉತ್ತರ ಹೇಳದೇ ಅಥವಾ ಹುಯಿಲು ಎಬ್ಬಿಸದೇ ಮೊದಲಿಗೆ ಕೈ ಎತ್ತಬೇಕು. ಹಾಗೆ ಒಬ್ಬರು ಮಾತನಾಡುವಾಗ ಅವರ ಬಾಯಿ ಬಡಿದು ಮತ್ತೊಬ್ಬರು ಮಾತನಾಡಕೂಡದು ಎಂಬ ಶಿಸ್ತು. ಸಾರೀ, ಥಾಂಕ್ ಯು, excuse me ಇತ್ಯಾದಿ ಸೌಜನ್ಯದ ಭಾಷಾ ಬಳಕೆ. ಎಲ್ಲಕ್ಕಿಂತಾ ಮುಖ್ಯವಾಗಿ ಮನೆಯಲ್ಲಿ ಯಾವುದೇ ರೀತಿ ದೌರ್ಜನ್ಯ ನಡೆದರೆ ಪೊಲೀಸರಿಗೆ ಕರೆ ಮಾಡಿ ತಿಳಿಸುವ ಸಂಖ್ಯೆ, ಮಧ್ಯಾಹ್ನ ಊಟವಾದ ಮೇಲೆ ಒಂದು ಘಂಟೆಯ ಕಾಲ ನಿದ್ರೆಯಾದ ಅವರ ಪುಟ್ಟ ಹಾಸಿಗೆ ಬಟ್ಟೆ ಎತ್ತಿಟ್ಟುಕೊಳ್ಳುವುದು, queue ಸಿಸ್ಟಮ್ ಪಾಲನೆ ಹೀಗೆ ಹತ್ತು ಹಲವಾರು ಕಲಿಕೆಗಳನ್ನು ಪಠ್ಯ ಎಂಬಂತೆ ಅಲ್ಲದೇ ಅತ್ಯಾವಶ್ಯಕ ಎಂಬಂತೆ ಕಲಿಸಲಾಗುತ್ತದೆ. ಹೀಗಾಗಿ ಇವರ ನೋಟ್ ಪುಸ್ತಕ ತೆರೆದು ಏನು ಮಾಡಿಸಿದರು ಎಂದರೆ ‘ಏನೂ ಇಲ್ಲ’ ಅಂತ ತಾನೇ ಹೇಳುತ್ತಾರೆ?

ಮಗರಾಯನ ಓದಿನ ಮುಂದಿನ ಹಂತವೇ K-12 ವಿದ್ಯಾಭಾಸದ ಮೊದಲ ಹೆಜ್ಜೆ ಅರ್ಥಾತ್ ‘K’ ಅಂದ್ರೆ Kindergarten. ಒಂದು ವಿಷಯವಂತೂ ಇಂದಿಗೂ ಹಚ್ಚಹಸಿರಾಗಿ ನೆನಪಿದೆ. Kindergarten ಟೀಚರ್ ಆರಂಭದಲ್ಲೇ ನಮಗೆ ಹೇಳಿದ್ದು ‘ಮನೆಯಲ್ಲಿ ಮಕ್ಕಳನ್ನು ನಿಮ್ಮ ಮಾತೃ ಭಾಷೆಯಲ್ಲೇ ಮಾತನಾಡಿಸಿ. ಇಂಗ್ಲಿಷ್ ವಿಷಯ ಬಿಡಿ. ಮನೆಯಿಂದ ಆಚೆ ಬಂದ ಮೇಲೆ ಅವರಾಗಿಯೇ ಕಲಿಯುತ್ತಾರೆ, ಶಾಲೆಯಲ್ಲಿ ನಾವು ಕಲಿಸಿರುತ್ತೇವೆ. ಆದರೆ ಮನೆಯಲ್ಲೂ ಇಂಗ್ಲಿಷ್ ಮಾತನಾಡಿಸಿದರೆ ಅವರ ಮಾತೃ ಭಾಷೆಯನ್ನು ಮರೆಯುತ್ತಾರೆ’. ಒಂದೆಡೆ ಅಚ್ಚರಿಯೂ ಆಯ್ತು, ಮತ್ತೊಂದು ಕಡೆ ಸಂತಸವೂ ಆಯ್ತು.

ಹೇರ್‌ ಕಟಿಂಗ್ ಅಂದ್ರೆ ಬರೀ ‘ಕ್ಷೌರ’ವಲ್ಲ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 21
ಇದೆಲ್ಲಾ ಒಂದು ಕಡೆ ನಡೆಯುತ್ತಿದ್ದರೆ ನಮ್ಮೂರಿನ ಕನ್ನಡ ಸಂಘದ ಚಟುವಟಿಕೆಗಳನ್ನು ವೀಕ್ಷಕನಾಗಿ ಪಾಲ್ಗೊಂಡಿದ್ದೆ. ಎರಡು ವರ್ಷಗಳ ಕಾರ್ಯಕಾರಿ ಸಮಿತಿಯವರ ಅವಧಿ ಮುಗಿದ ಮೇಲೆ ಎರಡನೆಯ ಸರದಿಯವರ ಕಾರ್ಯಾಚರಣೆ ಆರಂಭವಾಗಿತ್ತು. ಸಮಾರಂಭಗಳಿಗೆ potluck ಇದ್ದುದರಿಂದ ಅಡುಗೆಯ ಕೆಲಸದಲ್ಲಿ ನನ್ನಾಕೆ ಒಂದು ಹೆಜ್ಜೆ ಮುಂದೆ ಇರುತ್ತಿದ್ದಳು. ಆಗಿನ ದಿನಗಳಲ್ಲಿ ಇನ್ನೂ ಫೇಸ್ಬುಕ್, ವಾಟ್ಸಾಪ್ ಇಲ್ಲದೆ ಇದ್ದುದರಿಂದ, ಫೋನ್ ಕರೆ ಮಾಡಿ ಕಾರ್ಯಕ್ರಮಕ್ಕೆ invite ಮಾಡುವ ಪುಟ್ಟ ಕೆಲಸ ನಾನು ಮಾಡುತ್ತಿದ್ದೆ. ಜೊತೆಗೆ ಯಾವುದೇ ಮೀಟಿಂಗ್ ಇದ್ದರೂ ಸಮಿತಿಯವರ ಜೊತೆಗೆ ಇರುತ್ತಿದ್ದೆ. ಯಾವ ಕೆಲಸ ಹೇಗೆ ಮಾಡುತ್ತಾರೆ ಎಂಬುದನ್ನು ಗಮನಿಸುವುದೇ ನನ್ನ ಕೆಲಸವಾಗಿತ್ತು.

ಬರವಣಿಗೆಯ ಬಗ್ಗೆ ಆಸಕ್ತಿ ಇತ್ತು ಆದರೆ ಏನು ಬರೆಯಬೇಕು ಎಂಬುದು ಗೊತ್ತಿರಲಿಲ್ಲ. ಈ ಮಧ್ಯೆ ಒಂದು ಐಡಿಯಾ ಬಂದಿತ್ತು. ಅದನ್ನು ಕಾರ್ಯಗತ ಮಾಡಿ ಹೇಗೆ ಕೆಲಸ ಮಾಡುತ್ತದೆ ಎಂದು ನೋಡುವ ಸಲುವಾಗಿ ಮುಂದೆ ಹೆಜ್ಜೆ ಇಟ್ಟೆ.

ಬರವಣಿಗೆಯ ಮೊದಲ ಹೆಜ್ಜೆ ಇಡುವ ಸಲುವಾಗಿ ಕೈಗೆ ಕ್ಯಾಮೆರಾ ತೆಗೆದುಕೊಂಡೆ. ಮುಂದಿನ ವಾರ ನೋಡೋಣ ಬನ್ನಿ . . .

ಅವಕಾಶಗಳ ನಾಡಿನಲ್ಲಿ ಔದ್ಯೋಗಿಕ ತಲ್ಲಣಗಳು..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 22


Source link

x

Check Also

ಈ ರಾಶಿಯವರಿಗಿಂದು ತುಂಬಾನೇ ಲಾಭದ ದಿನ..! ಇಂದಿನ ಶುಭ, ಅಶುಭಗಳನ್ನು ತಿಳಿದುಕೊಳ್ಳಿ..

2021 ಆಗಸ್ಟ್‌ 20 ರ ಶುಕ್ರವಾರವಾದ ಇಂದು, ಚಂದ್ರನ ಸಂವಹನವು ಶನಿಯ ರಾಶಿ ಚಿಹ್ನೆಯಾದ ಮಕರ ರಾಶಿಯಲ್ಲಿ ಹಗಲು ರಾತ್ರಿ ...