Home » Kannada News » ಶ್ರೀಲಂಕಾ ಪ್ರವಾಸಕ್ಕೆ ದ. ಆಫ್ರಿಕಾ ತಂಡ ಪ್ರಕಟ, ಫಾಫ್‌ಗೆ ಕೊಕ್!

ಶ್ರೀಲಂಕಾ ಪ್ರವಾಸಕ್ಕೆ ದ. ಆಫ್ರಿಕಾ ತಂಡ ಪ್ರಕಟ, ಫಾಫ್‌ಗೆ ಕೊಕ್!

ಹೈಲೈಟ್ಸ್‌:

  • ಸೆಪ್ಟೆಂಬರ್‌ನಲ್ಲಿ ದಕ್ಷಿಣ ಆಫ್ರಿಕಾ ತಂಡದ ಶ್ರೀಲಂಕಾ ಪ್ರವಾಸ.
  • ಸೀಮಿತ ಓವರ್‌ಗಳ ಸರಣಿ ಸಲುವಾಗಿ ತಂಡ ಪ್ರಕಟ ಮಾಡಿದೆ ಸಿಎಸ್‌ಎ.
  • ಅನುಭವಿ ಬ್ಯಾಟ್ಸ್‌ಮನ್ ಹಾಗೂ ಮಾಜೀ ನಾಯಕ ಡು’ಪ್ಲೆಸಿಸ್‌ಗೆ ಇಲ್ಲ ಅವಕಾಶ.

ಹೊಸದಿಲ್ಲಿ: ಐಸಿಸಿ ಟಿ20 ಕ್ರಿಕೆಟ್‌ ವಿಶ್ವಕಪ್‌ ಟೂರ್ನಿಗೆ ಪೂರ್ವ ಸಿದ್ಧತೆಯಾಗಿ ಕಟ್ಟಕಡೆಯ ಸರಣಿಯನ್ನಾಡಲು ಶ್ರೀಲಂಕಾ ಪ್ರವಾಸ ಕೈಗೊಳ್ಳಲಿರುವ ದಕ್ಷಿಣ ಆಫ್ರಿಕಾ ತಂಡ ಗುರುವಾರ ತನ್ನ ತಂಡ ಪ್ರಕಟ ಮಾಡಿದ್ದು, ಅನುಭವಿ ಬ್ಯಾಟ್ಸ್‌ಮನ್‌ ಫಾಫ್ ಡು’ಪ್ಲೆಸಿಸ್‌ ಅವರನ್ನು ಕೈಬಿಟ್ಟು ಅಚ್ಚರಿ ಮೂಡಿಸಿದೆ.

ಕಳೆದ ಫೆಬ್ರವರಿಯಲ್ಲಿ 37 ವರ್ಷದ ಬಲಗೈ ಬ್ಯಾಟ್ಸ್‌ಮನ್‌ ಟೆಸ್ಟ್‌ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು. ಇದಾದ ಬಳಿಕ ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ತಂಡದ ಸೇವೆಯಲ್ಲಿ ಮುಂದುವರಿಯುವುದಾಗಿ ಹೇಳಿದ್ದರು. ಅಂದಿನಿಂದ ಇಂದಿನವರೆಗೆ ಅವರಿಗೆ ತಂಡದಲ್ಲಿ ಆಡುವ ಅವಕಾಶ ಸಿಕ್ಕಿಲ್ಲ. ಇದೀಗ ಶ್ರೀಲಂಕಾ ಪ್ರವಾಸಕ್ಕೂ ಆಯ್ಕೆಯಾಗದೇ ಇರುವುದರಿಂದ, ಅಕ್ಟೋಬರ್‌ನಲ್ಲಿ ಯುಎಇನಲ್ಲಿ ಶುರುವಾಗಲಿರುವ ಟಿ20 ವಿಶ್ವಕಪ್‌ಗೆ ಫಾಫ್‌ ಆಯ್ಕೆಯಾಗುವುದು ಅನುಮಾನ ಎಂಬಂತ್ತಾಗಿದೆ.

“ಮುಂದಿನ ಎರಡೂ ವರ್ಷಗಳು ಐಸಿಸಿ ಟೂರ್ನಿಗಳು ನಡೆಯಲಿವೆ. ಹೀಗಾಗಿ ಟೆಸ್ಟ್‌ ಕ್ರಿಕೆಟ್‌ಗೆ ವಿದಾಯ ಹೇಳಿ ಸೀಮಿತ ಓವರ್‌ಗಳ ಕಡೆಗೆ ಗಮನ ನೀಡಬೇಕೆಂದಿದ್ದೇನೆ. ಇದಕ್ಕಾಗಿ ಜಗತ್ತಿನಾದ್ಯಂತ ವಿವಿಧ ಲೀಗ್‌ಗಳಲ್ಲಿ ಆಡಿ ನನ್ನ ಆಟ ಅತ್ಯುತ್ತಮ ಲಯದಲ್ಲಿ ಇಟ್ಟುಕೊಳ್ಳುವ ಪ್ರಯತ್ನ ಮಾಡಲಿದ್ದೇನೆ,” ಎಂದು ಫಾಫ್‌ ಹೇಳಿಕೊಂಡಿದ್ದರು.

ಇದೀಗ ಶ್ರೀಲಂಕಾ ವಿರುದ್ಧದ ಸರಣಿ ಸೆಪ್ಟೆಂಬರ್‌ 14ರಂದು ಆರಂಭವಾಗಲಿದೆ. ಇದಾದ 5 ದಿನಗಳಿಗೆ ಐಪಿಎಲ್ 2021 ಟೂರ್ನಿಯ 2ನೇ ಚರಣ ಶುರುವಾಗಲಿದ್ದು, ಫಾಫ್ ಡು’ಪ್ಲೆಸಿಸ್‌ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದ ಪರ ಕಣಕ್ಕಿಳಿಯುವ ಸಾಧ್ಯತೆ ಹೆಚ್ಚಾಗಿದೆ. ಈ ವರ್ಷ ಐಪಿಎಲ್‌ನಲ್ಲಿ ಫಾಫ್‌ 320 ರನ್‌ ಬಾರಿಸಿ ಭರ್ಜರಿ ಲಯದಲ್ಲಿದ್ದಾರೆ.

ಕಳೆದ ಡಿಸೆಂಬರ್‌ನಲ್ಲಿ ಕೊನೆಯ ಬಾರಿ ದಕ್ಷಿಣ ಆಫ್ರಿಕಾ ಪರ ಟಿ20 ಕ್ರಿಕೆಟ್‌ ಆಡಿರುವ ಫಾಫ್, ಇಂಗ್ಲೆಂಡ್ ವಿರುದ್ಧ ನಡೆದಿದ್ದ 3 ಪಂದ್ಯಗಳ ಟಿ20 ಸರಣಿಯಲ್ಲಿ 2 ಅರ್ಧಶತಕ ಬಾರಿಸಿದ್ದರು. ಇದಾದ ಬಳಿಕ ಹರಿಣ ಪಡೆ 15 ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ಪಂದ್ಯಗಳನ್ನು ಆಡಿದೆ.

ದಕ್ಷಿಣ ಆಫ್ರಿಕಾ ಒಡಿಐ ತಂಡ ಹೀಗಿದೆ
ತೆಂಬಾ ಬಾವೂಮ (ನಾಯಕ), ಜೂನಿಯರ್ ಡಾಲಾ, ಬ್ಯೂರಾನ್ ಹೆಂಡ್ರಿಕ್ಸ್, ರೀಝಾ ಹೆಂಡ್ರಿಕ್ಸ್, ಹೆನ್ರಿಕ್ ಕ್ಲಾಸೆನ್, ಜಾರ್ಜ್ ಲಿಂಡೆ, ಜನ್ನೆಮನ್ ಮಲಾನ್, ಕೇಶವ್ ಮಹಾರಾಜ್, ಏಡೆನ್ ಮಾರ್ಕ್ರಮ್, ವಿಯಾನ್ ಮುಲ್ಡರ್, ಎನ್ರಿಚ್ ನೊರ್ಕಿಯ, ಆಂಡಿಲ್ ಫೆಹ್ಲುಕ್ವಾಯೊ, ಡ್ವೇನ್ ಪ್ರೆಟೋರಿಯಸ್, ಕಗಿಸೊ ರಬಾಡ, ತಬ್ರೇಝ್ ಶಾಮ್ಸಿ, ರಾಸಿ ವ್ಯಾನ್‌ ಡೆರ್‌ ಡುಸೆನ್, ಕೈಲ್‌ ವೆರ್ರಿನ್, ಲಿಝಾಡ್ ವಿಲಿಯಮ್ಸ್.

ದಕ್ಷಿಣ ಆಫ್ರಿಕಾ ಟಿ20 ತಂಡ
ತೆಂಬಾ ಬಾವುಮಾ (ನಾಯಕ), ಕ್ವಿಂಟನ್ ಡಿ’ಕಾಕ್, ಯೊರ್ನ್ ಫಾರ್ಚೂನ್, ಬ್ಯೂರಾನ್ ಹೆಂಡ್ರಿಕ್ಸ್, ರೀಝಾ ಹೆಂಡ್ರಿಕ್ಸ್, ಎನ್ರಿಚ್ ಕ್ಲಾಸೆನ್, ಲಿಂಡೆ, ಕೇಶವ್ ಮಹಾರಾಜ್, ಸಿಸಾಂಡ ಮಗಲ, ಏಡೆನ್ ಮಾರ್ಕ್ರಮ್, ಡೇವಿಡ್ ಮಿಲ್ಲರ್, ವಿಯಾನ್ ಮುಲ್ಡರ್, ಲುಂಗಿ ಎನ್ಗಿಡಿ, ಎನ್ರಿಕ್ ನೊರ್ಕಿಯ, ಡ್ವೇನ್ ಪ್ರೆಟೋರಿಯಸ್, ಕಗಿಸೊ ರಬಾಡ, ತಬ್ರೇಝ್ ಶಾಮ್ಸಿ, ವ್ಯಾನ್ ಡೆರ್’ಡುಸೆನ್ , ಲಿಝಾಡ್ ವಿಲಿಯಮ್ಸ್.


Source link

x

Check Also

ಶಾಲೆಗಳಲ್ಲಿ ಕಲಿಸುತ್ತಾರೆ ಜೀವನ ಪಾಠ..! ಶ್ರೀನಾಥ್ ಭಲ್ಲೆ ಅಮೆರಿಕ ಅನುಭವ ಕಥನ – ಭಾಗ 23

ಈ ದೇಶಕ್ಕೆ ಬಂದ ಆರಂಭದಲ್ಲೇ ನಮ್ಮ ಕಂಪನಿಯವರು ಅಮೆರಿಕನ್ ಆಂಗ್ಲದ ಪರಿಚಯ ಮಾಡಿಸಲೆಂದೇ ESL – English as Second ...