Home » Kannada News » 120ಕ್ಕೆ ಆಲ್‌ಔಟ್‌!, ಇಂಗ್ಲೆಂಡ್‌ಗೆ ಹೀನಾಯ ಸೋಲಿನ ಬರೆ ಎಳೆದ ಭಾರತ

120ಕ್ಕೆ ಆಲ್‌ಔಟ್‌!, ಇಂಗ್ಲೆಂಡ್‌ಗೆ ಹೀನಾಯ ಸೋಲಿನ ಬರೆ ಎಳೆದ ಭಾರತ

ಹೈಲೈಟ್ಸ್‌:

  • ಭಾರತ-ಇಂಗ್ಲೆಂಡ್‌ ನಡುವಣ ಐದು ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್‌ ಸರಣಿ.
  • ಲಾರ್ಡ್ಸ್‌ ಟೆಸ್ಟ್‌ ಪಂದ್ಯದಲ್ಲಿ ಭಾರತಕ್ಕೆ 151 ರನ್‌ಗಳ ಭರ್ಜರಿ ಗೆಲುವು.
  • ಕೊನೇ ದಿನ ಮಿಂಚಿದ ಮೊಹಮ್ಮದ್‌ ಶಮಿ, ಮೊಹಮ್ಮದ್‌ ಸಿರಾಜ್.

ಲಂಡನ್‌: ಹಾವು ಏಣಿ ಆದಂತೆ ಸಾಗಿಬಂದ ಲಾರ್ಡ್ಸ್‌ ಟೆಸ್ಟ್‌ ಪಂದ್ಯದಲ್ಲಿ ಅದ್ಭುತ ಕಮ್‌ಬ್ಯಾಕ್‌ ಮಾಡಿದ ಟೀಮ್ ಇಂಡಿಯಾ, ಅಂತಿಮ ದಿನದಾಟದಲ್ಲಿ ಕ್ರಿಕೆಟ್‌ ಪಂಡಿತರ ಲೆಕ್ಕಾಚಾರಗಳನ್ನೆಲ್ಲಾ ತಲೆ ಕೆಳಗಾಗುವಂತೆ ಮಾಡಿ ಇಂಗ್ಲೆಂಡ್‌ ತಂಡಕ್ಕೆ 151 ರನ್‌ಗಳ ಹೀನಾಯಕ ಸೋಲಿನ ಬರೆ ಎಳೆಯುವಲ್ಲಿ ಯಶಸ್ವಿಯಾಯಿತು.

ಟೆಸ್ಟ್‌ ಕ್ರಿಕೆಟ್‌ನ ಇತಿಹಾಸದಲ್ಲಿ ಇಂಗ್ಲೆಂಡ್‌ ತಂಡ ಭಾರತದ ಎದುರು ಮನೆಯಂಗಣದಲ್ಲಿ ದಾಖಲಿಯ ಅತ್ಯಂತ ಕಡಿಮೆ ಮೊತ್ತಕ್ಕೆ. ಕ್ರಿಕೆಟ್‌ನ ಜನ್ಮ ಭೂಮಿ ಲಾರ್ಡ್ಸ್‌ ಅಂಗಣದಲ್ಲಿ ಇಂಗ್ಲೆಂಡ್‌ ತನ್ನ ಎರಡನೇ ಇನಿಂಗ್ಸ್‌ನಲ್ಲಿ 120 ರನ್‌ಗಳಿಗೆ ಆಲ್‌ಔಟ್‌ ಆಗುವ ಮೂಲಕ ಹೀನಾಯ ಸೋಲಿನ ಮರ್ಮಾಘಾತಕ್ಕೀಡಾಯಿತು.

ಇದು ಕ್ರಿಕೆಟ್‌ ಕಾಶಿ ಲಾರ್ಡ್ಸ್‌ ಕ್ರೀಡಾಂಗಣದಲ್ಲಿ ಭಾರತ ತಂಡಕ್ಕೆ ಸಿಕ್ಕ ಮೂರನೇ ಗೆಲುವು ಎಂಬುದು ವಿಶೇಷ. 1986ರಲ್ಲಿ ಮೊದಲ ಬಾರಿ ಲಾರ್ಡ್ಸ್‌ನಲ್ಲಿ ಭಾರತ ತಂಡ ಟೆಸ್ಟ್‌ ಪಂದ್ಯ ಗೆದ್ದು, 5 ವಿಕೆಟ್‌ಗಳ ಜಯದ ಸವಿಯುಂಡಿತ್ತು. ನಂತರ 2014ರಲ್ಲಿ ಅಜಿಂಕ್ಯ ರಹಾನೆ ಶತಕದ ಬಲದಿಂದ 95 ರನ್‌ಗಳ ಜಯ ದಾಖಲಿಸಿದರೆ, ಇದೀದ ಸಂಘಟಿತ ಹೋರಾಟದ ಫಲವಾಗಿ 151 ರನ್‌ಗಳಿಂದ ಗೆದ್ದು ಇತಿಹಾಸ ಬರೆದಿದೆ.

‘ಅತ್ಯಂತ ವಿಚಿತ್ರ ರಣತಂತ್ರ’, ರೂಟ್‌ ನಾಯಕತ್ವವನ್ನು ಟೀಕಿಸಿದ ವಾನ್!

ಪಂದ್ಯದ ಐದನೇ ಹಾಗೂ ಅಂತಿಮ ದಿನದಾಟದಲ್ಲಿ 6 ವಿಕೆಟ್‌ಗೆ 181 ರನ್‌ಗಳಿಂದ 2ನೇ ಇನಿಂಗ್ಸ್‌ ಬ್ಯಾಟಿಂಗ್‌ ಮುಂದುವರಿಸಿದ ಭಾರತ ತಂಡ 208 ರನ್‌ ಗಳಿಸುವ ಹೊತ್ತಿಗೆ 8 ವಿಕೆಟ್‌ ಕಳೆದುಕೊಂಡಿತ್ತು. ಪ್ರಮುಖ ಬ್ಯಾಟರ್‌ ರಿಷಭ್ ಪಂತ್‌ (22) ಪೆವಿಲಿಯನ್‌ ಸೇರುತ್ತಿದ್ದಂತೆಯೇ ಭಾರತ ತಂಡದ ಒಟ್ಟು ಮುನ್ನಡೆ 200 ರನ್‌ಗಳ ಗಡಿ ದಾಟುವುದು ಕೂಡ ಅನುಮಾನ ಎಂಬಂತ್ತಿತ್ತು.

ಬಳಿಕ ಪವಾಡ ರೀತಿಯಲ್ಲಿ ಭಾರತ ತಂಡಕ್ಕೆ ಕೆಳ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ರನ್‌ ಹೆಕ್ಕಿಕೊಟ್ಟರು. ಪ್ರಥಮ ಇನಿಂಗ್ಸ್‌ನಲ್ಲಿ ಸೊನ್ನೆ ಸುತ್ತಿದ್ದ ಮೊಹಮ್ಮದ್‌ ಶಮಿ (58*) ಮತ್ತು ಜಸ್‌ಪ್ರೀತ್‌ ಬುಮ್ರಾ (34*) ಇಬ್ಬರೂ ಬ್ಯಾಟ್ಸ್‌ಮನ್‌ಗಳ ಅವತಾರ ತಾಳಿ 9ನೇ ವಿಕೆಟ್‌ಗೆ ದಾಖಲೆಯ 89* ರನ್‌ಗಳ ಜೊತೆಯಾಟವಾಡಿ ತಂಡಕ್ಕೆ 271 ರನ್‌ಗಳ ಭರ್ಜರಿ ಮುನ್ನಡೆ ತಂದುಕೊಟ್ಟರು. 298/8 ರನ್‌ಗಳಿಗೆ ಎರಡನೇ ಇನಿಂಗ್ಸ್‌ ಡಿಕ್ಲೇರ್‌ ಮಾಡಿಕೊಂಡ ಭಾರತ ತಂಡ ಐದನೇ ದಿನ ಭೋಜನದ ಬಳಿಕ ಆತಿಥೇಯರಿಗೆ 2ನೇ ಇನಿಂಗ್ಸ್‌ ಆರಂಭಿಸುವಂತೆ ಆಹ್ವಾನಿಸಿತು.

9ನೇ ವಿಕೆಟ್‌ಗೆ ದಾಖಲೆಯ ಜೊತೆಯಾಟ ಕಟ್ಟಿದ ಶಮಿ-ಬುಮ್ರಾ!

ಭಾರತ ತಂಡದ ಭರ್ಜರಿ ಬೌಲಿಂಗ್‌
ಕೈಲಿದ್ದ 60 ಓವರ್‌ಗಳಲ್ಲಿ ಪಂದ್ಯ ಗೆಲ್ಲಲು ಭಾರತ ತಂಡಕ್ಕೆ 10 ವಿಕೆಟ್‌ಗಳ ಅಗತ್ಯವಿತ್ತು. ಮೊದಲ ಎರಡು ಓವರ್‌ಗಳಲ್ಲೇ ಆತಿಥೇಯರಿಗೆ ಮರ್ಮಾಘಾತ ನಿಡಿದ ಜಸ್‌ಪ್ರೀತ್‌ ಬುಮ್ರಾ ಮತ್ತು ಮೊಹಮ್ಮದ್‌ ಶಮಿ, ಇಂಗ್ಲೆಂಡ್‌ನ ಇಬ್ಬರೂ ಓಪನರ್‌ಗಳನ್ನು (ರೋರಿ ಬರ್ನ್ಸ್‌, ಡಾಮ್‌ ಸಿಬ್ಲೀ) ಶೂನ್ಯಕ್ಕೆ ಪೆವಿಲಿಯನ್‌ ಸೇರುವಂತೆ ಮಾಡಿದರು. ಬಳಿಕ ಚಹಾ ವಿರಾಮಕ್ಕೂ ಮುನ್ನ ಹಸೀಬ್‌ ಹಮೀದ್ ಮತ್ತು ಜಾನಿ ಬೈರ್‌ಸ್ಟೋವ್ ಇಬ್ಬರನ್ನೂ ಬಲಿ ಪಡೆಯುವಲ್ಲಿ ಇಶಾಂತ್‌ ಶರ್ಮಾ ಸಫಲರಾದರು.

ಚಹಾ ವಿರಾಮದ ನಂತರ ಅಪಾಯಕಾರಿ ಬ್ಯಾಟ್ಸ್‌ಮನ್‌ ಜೋ ರೂಟ್‌ (33) ಅವರನ್ನು ಬುಮ್ರಾ ಔಟ್‌ ಮಾಡುತ್ತಿದ್ದಂತೆಯೇ ಭಾರತಕ್ಕೆ ಗೆಲುವು ಖಾತ್ರಿಯಾಗಿತ್ತು. ಟೇಲೆಂಡರ್‌ಗಳನ್ನು ಕೈಬೆರಳ ತುಡಿಯಲ್ಲಿ ಕುಣಿಸಿದ ಯುವ ವೇಗಿ ಮೊಹಮ್ಮದ್‌ ಸಿರಾಜ್‌ ಬ್ಯಾಕ್‌ ಟು ಬ್ಯಾಕ್‌ ವಿಕೆಟ್‌ ಒಳಗೊಂಡಂತೆ ಒಟ್ಟು ನಾಲ್ಕು ವಿಕೆಟ್‌ಗಳನ್ನು ಕಿತ್ತು ಟೀಮ್ ಇಂಡಿಯಾಗೆ ಜಯದ ಮಾಲೆ ತೊಡಿಸಿದರು. ಇಂಗ್ಲೆಂಡ್‌ ಪರ ಕೊನೆಯ ಬ್ಯಾಟ್ಸ್‌ಮನ್‌ ಜೇಮ್ಸ್‌ ಆಂಡರ್ಸನ್‌ ಅವರನ್ನು ಸಿರಾಜ್‌ ಬೌಲ್ಡ್‌ ಮಾಡುತ್ತಿದ್ದಂತೆಯೇ ಭಾರತ ತಂಡದ ಸಂಭ್ರಮ ಮುಗಿಲು ಮುಟ್ಟಿತ್ತು.

ಶಮಿ ವೀರಾವೇಶದ ಅರ್ಧಶತಕಕ್ಕೆ ಸಲ್ಯೂಟ್ ಹೊಡೆದ ದಿಗ್ಗಜರು!

ರಾಹುಲ್‌ ಪಂದ್ಯಶ್ರೇಷ್ಠ
ಪಂದ್ಯದ ಮೊದಲ ಇನಿಂಗ್ಸ್‌ನಲ್ಲಿ 129 ರನ್‌ಗಳ ಮನಮೋಹಕ ಶತಕ ಬಾರಿಸಿದ ಭಾರತ ತಂಡದ ಆರಂಭಿಕ ಬ್ಯಾಟ್ಸ್‌ಮನ್‌ ಕೆಎಲ್‌ ರಾಹುಲ್‌ ಅವರಿಗೆ ಪಂದ್ಯಶ್ರೇಷ್ಠ ಗೌರವ ಲಭ್ಯವಾಯಿತು. ಇದು ರಾಹುಲ್‌ ಟೆಸ್ಟ್‌ ವೃತ್ತಿಬದುಕಿನ 6ನೇ ಶತಕವಾಗಿದೆ.

ದ್ವಿತೀಯ ಟೆಸ್ಟ್‌ ಪಂದ್ಯದ ಸಂಕ್ಷಿಪ್ತ ಸ್ಕೋರ್‌
ಭಾರತ: ಮೊದಲ ಇನಿಂಗ್ಸ್‌ 126.1 ಓವರ್‌ಗಳಲ್ಲಿ 364 ರನ್‌ಗಳಿಗೆ ಆಲ್‌ಔಟ್‌ (ರೋಹಿತ್‌ ಶರ್ಮಾ 83, ಕೆಎಲ್‌ ರಾಹುಲ್ 129, ಚೇತೇಶ್ವರ್‌ ಪೂಜಾರ 9, ವಿರಾಟ್ ಕೊಹ್ಲಿ 42, ಅಜಿಂಕ್ಯ ರಹಾನೆ 1, ರಿಷಭ್ ಪಂತ್ 37, ರವೀಂದ್ರ ಜಡೇಜಾ 39; ಜೇಮ್ಸ್‌ ಆಂಡರ್ಸನ್ 62ಕ್ಕೆ 5, ಓಲ್ಲೀ ರಾಬಿನ್ಸನ್‌ 73ಕ್ಕೆ 2, ಮಾರ್ಕ್‌ ವುಡ್‌ 91ಕ್ಕೆ 2).
ಇಂಗ್ಲೆಂಡ್: ಮೊದಲ ಇನಿಂಗ್ಸ್‌ 128 ಓವರ್‌ಗಳಲ್ಲಿ 391 ರನ್ (ರೋರಿ ಬರ್ನ್ಸ್‌ 49, ಡಾಮ್ ಸಿಬ್ಲೀ 11, ಜೋ ರೂಟ್‌ ಔಟಾಗದೆ 180, ಜಾನಿ ಬೈರ್‌ಸ್ಟೋವ್ 57; ಮೊಹಮ್ಮದ್‌ ಸಿರಾಜ್ 94ಕ್ಕೆ 4, ಇಶಾಂತ್‌ ಶರ್ಮಾ 69ಕ್ಕೆ 3, ಮೊಹಮ್ಮದ್‌ ಶಮಿ 95ಕ್ಕೆ 2).
ಭಾರತ: ಎರಡನೇ ಇನಿಂಗ್ಸ್‌ 109.3 ಓವರ್‌ಗಳಲ್ಲಿ 8 ವಿಕೆಟ್‌ಗೆ 298 ರನ್ ಡಿ. (ರೋಹಿತ್‌ ಶರ್ಮಾ 21, ವಿರಾಟ್ ಕೊಹ್ಲಿ 20, ಚೇತೇಶ್ವರ್‌ ಪೂಜಾರ 45, ಅಜಿಂಕ್ಯ ರಹಾನೆ 61, ಮೊಹಮ್ಮದ್‌ ಶಮಿ 58*, ರಿಷಭ್ ಪಂತ್ 22, ಇಶಾಂತ್‌ ಶರ್ಮಾ 16, ಜಸ್‌ಪ್ರೀತ್‌ ಬುಮ್ರಾ 34; ಮಾರ್ಕ್‌ ವುಡ್‌ 51ಕ್ಕೆ 3, ಮೊಯೀನ್‌ ಅಲಿ 84ಕ್ಕೆ 2, ಓಲ್ಲೀ ರಾಬಿನ್ಸನ್‌ 42ಕ್ಕೆ 2, ಸ್ಯಾಮ್‌ ಕರ್ರನ್ 42ಕ್ಕೆ 1).
ಇಂಗ್ಲೆಂಡ್: 2ನೇ ಇನಿಂಗ್ಸ್ 51.5 ಓವರ್‌ಗಳಲ್ಲಿ 120ಕ್ಕೆ ಆಲ್‌ಔಟ್‌ (ಜೋ ರೂಟ್‌ 33, ಜೋಸ್‌ ಬಟ್ಲರ್‌ 25; ಮೊಹಮ್ಮದ್ ಸಿರಾಜ್ 32ಕ್ಕೆ 4, ಜಸ್‌ಪ್ರೀತ್‌ ಬುಮ್ರಾ 33ಕ್ಕೆ 3, ಇಶಾಂತ್‌ ಶರ್ಮಾ 13ಕ್ಕೆ 2, ಮೊಹಮ್ಮದ್‌ ಶಮಿ 13ಕ್ಕೆ 1).


Source link

x

Check Also

ಫೋರ್ಬ್ಸ್‌ 100 ಶ್ರೀಮಂತರ ಪಟ್ಟಿ: ಮೊದಲ ಸ್ಥಾನದಲ್ಲೇ ಮುಂದುವರಿದ ಮುಕೇಶ್‌ ಅಂಬಾನಿ

ಹೈಲೈಟ್ಸ್‌: ಫೋರ್ಬ್ಸ್‌ 100 ಶ್ರೀಮಂತರ ಪಟ್ಟಿ ಪ್ರಕಟ ಮೊದಲ ಸ್ಥಾನದಲ್ಲೇ ಮುಂದಿವರಿದ ರಿಲಯನ್ಸ್‌ ಅಧ್ಯಕ್ಷ ಮುಕೇಶ್‌ ಅಂಬಾನಿ ಗೌತಮ್‌ ಅದಾನಿಗೆ ...